Qozog‘istonning xalqaro sayyohlik poyezdi Toshkentga yetib keldi, deb xabar bermoqda shahar hokimligi axborot xizmati.
Keltirilishicha, bugun, 22-mart kuni Qozog‘istonning xalqaro sayyohlik poyezdi — “Jibek Joly” (Ipak Yo‘li) Toshkent markaziy vokzaliga yetib keldi. Poytaxt vakillari mehmonlarni mehmondo‘stlik bilan kutib oldi. Poyezdda kelgan 400 nafardan ortiq sayyohlar O‘zbekistonning boy madaniyati, urf-odatlari va tarixiy merosi bilan tanishish imkoniyatiga ega bo‘ladi.
Qayd etilishicha, ushbu tashrif mintaqalararo turistik aloqalarni kengaytirish va sayyohlik yo‘nalishlarini yanada rivojlantirishda muhim qadam bo‘lib xizmat qiladi.
“Jibek Joly” poyezdi sayohatchilarga tarixiy shaharlarga bemalol tashrif buyurish, tabiiy go‘zalliklardan bahramand bo‘lish va madaniy meros bilan yaqindan tanishish imkonini yaratadi.
Ma’lumot uchun, “Jibek Joly” sayyohlik poyezdi o‘zining ilk qatnovini o‘tgan yilning noyabr oyida amalga oshirgan. Loyihaning asosiy maqsadi turizmni rivojlantirish, mintaqalararo madaniy aloqalarni mustahkamlash va iqtisodiy hamkorlikni kengaytirishdan iborat. Shuningdek, xalqaro turizm yo‘nalishlarida qulay va xavfsiz transport tizimini yaratish ham muhim vazifalar sirasiga kiradi.
O‘zbekiston va Italiya The Samarkand express hashamatli sayyohlik poyezdini yo‘lga qo‘yadi. Poyezd nafaqat transport vositasi, balki yo‘lovchilarga qadimiy va zamonaviy O‘zbekiston tarixi, anʼanalari va turmush tarzi bilan tanishish imkoniyatini beruvchi madaniy almashinuv platformasi bo‘ladi.
Izoh (0)