Qozog‘istonning Olmaota aeroportida pichoq ko‘targan yo‘lovchi xodimni garovga oldi. Bu haqda “Zakon.kz” xabar berdi.
Hodisa 7-mart kuni soat 11:45 atrofida ichki reyslar terminalida sodir bo‘lgan. Aeroport ma’lumotlariga ko‘ra, erkak yo‘lovchi qiyofasida parvozdan oldingi tekshiruv zonasiga yaqinlashgan. Xodimlar hujjatlarini ko‘rsatishni so‘raganida, u to‘satdan xodimni ushlab olib, unga pichoq bilan tahdid qila boshlagan.
Ta’kidlanishicha, 7 daqiqadan so‘ng erkak politsiya va aviatsiya xavfsizligi xodimlari tomonidan qurolsizlantirilgan. Hozirda u qo‘lga olingan, hodisa huquqni muhofaza qiluvchi organlar tomonidan o‘rganilmoqda.
Dunyo bo‘ylab yanvar-fevral oylarida bir qator pichoqbozliklar va odamlarni qasddan bosib ketish holatlari kuzatildi:
20-fevral kuni Chexiyada savdo markazidagi pichoqbozlikda ikki ayol halok bo‘ldi. Gumonlanuvchi 16 yoshli o‘smir. U voqeadan o‘n daqiqa o‘tib qo‘lga olingan. Politsiya ma’lumotlariga ko‘ra, ikkala qurbon ham hujum sodir bo‘lgan do‘konda ishlagan. Hujum sababi hozircha noma’lum, tergov davom etmoqda.
16-fevral kuni Avstriyada suriyalik erkak o‘tkinchilarni pichoqladi. Hujum oqibatida 14 yoshli o‘smir halok bo‘ldi va yana 5 kishi jarohat oldi, ulardan ikki nafari og‘ir ahvolda. Jinoyatchini qo‘lga olishda yaqin atrofda bo‘lgan suriyalik kuryer muhim rol o‘ynadi. U yangi qurbonlarning oldini olish uchun hujum qilgan erkakni ataylab mashinasida urib yubordi.
13-fevral kuni Germaniyada afg‘onistonlik muhojir olomonni mashinada bosib ketdi. Oqibatda 28 kishi jarohat oldi, ular orasida bolalar ham bor. Jabrlanganlarning kamida bittasi og‘ir ahvolda.
31-yanvar Rossiyada erkak poyezd yo‘lovchilariga pichoq bilan hujum qildi. Oqibatda erkak va ayol jarohatlandi. Yo‘lovchilar vagondan evakuatsiya qilingan, erkak esa qo‘lga olingan.
22-yanvar Germaniyada afg‘onistonlik erkak odamlarga pichoq bilan hujum qildi. Qurbonlar 41 yoshli erkak va 2 yoshli o‘g‘il bola bo‘lgan. Bundan tashqari, politsiya xabarida ikki nafar og‘ir yarador shifoxonaga joylashtirilgani aytilgan.
22-yanvar Tel-Avivda pichoq bilan qurollangan erkak odamlarga hujum qildi. Hodisa oqibatida 4 kishi jarohat olgan. Hujum qilgan shaxs 2022-yildan beri AQSH rezidenti hisoblangan marokashlik Qodi Abdel Aziz ekani aytilmoqda. U zararsizlantirilgan.
14-yanvar Krasnoyarsk xalqaro aeroportida o‘zbekistonlik erkak pichoq bilan odamga hujum qildi. O‘zbekiston fuqarosi mast holda bo‘lganini aytgan, jabrlanuvchi shifoxonaga yotqizilgan.
Izoh (0)