Fransiyaning Myuluz shahrida 22-fevral kuni jazoirlik migrant o‘tkichilarga pichoq bilan hujum qildi. Oqibatda bir kishi halok bo‘ldi, 5 nafar politsiyachi jarohatlandi. Bu haqda France 24 xabar berdi.
Gumonlanuvchi voqea joyida qo‘lga olingan. Dastlab jarohatlanganlar soni ikki nafarni tashkil etgan. Jumladan, rrkak ikki nafar politsiyachiga birining bo‘ynidan, ikkinchisining ko‘krak qismidan jiddiy jarohat yetkazgan. Hodisaga bevosita guvoh bo‘lgan shaxs aralashmoqchi bo‘lganida hujumga uchragan va halok bo‘lgan.
Hodisa politsiyachilar patrullik qilayotgan Kongoni qo‘llab-quvvatlash namoyishida yuz bergan. Mahalliy prokurorga ko‘ra, gumonlanuvchi 37 yoshli jazoirlik bo‘lib, u terrorizmda gumonlangani sababli mamlakatni tark etishi kerak edi. Unga Fransiya hududini tark etish majburiyati yuklangan, biroq Jazoir unga konsullik vizasini bermagan. Holat yuzasidan tergov harakatlari olib borilmoqda.
Dunyo bo‘ylab yanvar-fevral oylarida bir qator pichoqbozliklar va odamlarni qasddan bosib ketish holatlari kuzatildi:
20-fevral kuni Chexiyada savdo markazidagi pichoqbozlikda ikki ayol halok bo‘ldi. Gumonlanuvchi 16 yoshli o‘smir. U voqeadan o‘n daqiqa o‘tib qo‘lga olingan. Politsiya ma’lumotlariga ko‘ra, ikkala qurbon ham hujum sodir bo‘lgan do‘konda ishlagan. Hujum sababi hozircha noma’lum, tergov davom etmoqda.
16-fevral kuni Avstriyada suriyalik erkak o‘tkinchilarni pichoqladi. Hujum oqibatida 14 yoshli o‘smir halok bo‘ldi va yana 5 kishi jarohat oldi, ulardan ikki nafari og‘ir ahvolda. Jinoyatchini qo‘lga olishda yaqin atrofda bo‘lgan suriyalik kuryer muhim rol o‘ynadi. U yangi qurbonlarning oldini olish uchun hujum qilgan erkakni ataylab mashinasida urib yubordi.
13-fevral kuni Germaniyada afg‘onistonlik muhojir olomonni mashinada bosib ketdi. Oqibatda 28 kishi jarohat oldi, ular orasida bolalar ham bor. Jabrlanganlarning kamida bittasi og‘ir ahvolda.
31-yanvar Rossiyada erkak poyezd yo‘lovchilariga pichoq bilan hujum qildi. Oqibatda erkak va ayol jarohatlandi. Yo‘lovchilar vagondan evakuatsiya qilingan, erkak esa qo‘lga olingan.
22-yanvar Germaniyada afg‘onistonlik erkak odamlarga pichoq bilan hujum qildi. Qurbonlar 41 yoshli erkak va 2 yoshli o‘g‘il bola bo‘lgan. Bundan tashqari, politsiya xabarida ikki nafar og‘ir yarador shifoxonaga joylashtirilgani aytilgan.
22-yanvar Tel-Avivda pichoq bilan qurollangan erkak odamlarga hujum qildi. Hodisa oqibatida 4 kishi jarohat olgan. Hujum qilgan shaxs 2022-yildan beri AQSH rezidenti hisoblangan marokashlik Qodi Abdel Aziz ekani aytilmoqda. U zararsizlantirilgan.
14-yanvar Krasnoyarsk xalqaro aeroportida o‘zbekistonlik erkak pichoq bilan odamga hujum qildi. O‘zbekiston fuqarosi mast holda bo‘lganini aytgan, jabrlanuvchi shifoxonaga yotqizilgan.
Izoh (0)