“Toshkentning sho‘x qizi” sifatida e’tirof etiladigan Dilfuza Ismoilova 17-fevral kuni 57 yoshni qarshi oldi. Faoliyatining dastlabki yillarida komik aktrisa sifatida tomoshabinlar nazariga tushgan xonanda hozirda muvaffaqiyatli tadbirkor sifatida ham faoliyat yuritib kelmoqda.
“Otam Dipu o‘g‘lim deb erkalatardi”
Dilfuza Ismoilova sanʼatga aloqasi bo‘lmagan oilada dunyoga kelgan. Shu bois otasi uning sanʼatkor bo‘lishiga jiddiy qarshilik qilgan.
— Oilada yetti qiz va bir o‘g‘il bo‘lganmiz. Ota hovlimiz shahar markazidagi Qoratosh mavzesida bo‘lsa-da, uyimizda chorva mollarini ham boqardik. Ertalab maktabga ketishdan avval betondagi sutlarni sotib kelish kaminaning vazifasi bo‘lgan. Shu boisdanmi men qizlardek nozik tabiatli, nimjon bo‘lmaganman. Loy qorib, g‘isht quyishni ham uddalaganim uchun otam rahmatli “Dipu o‘g‘lim” deb erkalardi. Men shahardagi 116-maktabda o‘qiganman. “Bahor qaytmaydi” serialida Anvar rolini ijro etgan Rustam Abzalov maktabimizda direktor edi. U inson ham sanʼatni sevgani uchun drama to‘garagini tashkil qilgandi. Ko‘pchilik qizlar qatori to‘garakka qatnashganman va sanʼatga mehr qo‘yganman. Onam “Farzandlarimdan birortasi mashhur bo‘lsa, puli ko‘p bo‘lsa”, deb orzu qilardi, ammo otam rahmatli bu sohani tanlashimga jiddiy qarshilik qilgan. Keyinchalik o‘zi duo bilan fotiha bergan, deydi Dilfuza Ismoilova.
Moskvadan kelgan taklif
Dilfuza Ismoilova 1985-yili sanʼat institutining “Kino va drama” fakultetiga o‘qishga kirgan. O‘sha yili mashhur rejissyor Shuhrat Abbosov eng isteʼdodli aktyorlarni izlayotgani haqidagi gap-so‘zlar tarqaladi. Rejissyor isteʼdodli abituriyentlar orasidan Dilfuza Ismoilovani tanlab oladi.
— Shuhrat Abbosovning kursida o‘qish oson emasdi. Talabchan, izlanuvchan va nihoyatda qattiqqo‘l ustoz edi. Ko‘pchilik meni komik aktrisa sifatida taniydi, ammo men talabalik chog‘larimda dramatik rollarni ham ijro etganman. Har kuni tayyorgarlik bo‘lardi, rol ko‘ngildagidek chiqmasa, ustozimiz ketishimizga yo‘l qo‘ymasdi. Shunday kunlarning birida rossiyalik kinoijodkorlar o‘zbek qizi roli uchun aktrisa izlayotgan ekan. Men haqimdagi maʼlumotlar ularga qanday borib qolganini bilmayman. 1987-yili ular Moskvaga taklif qildi, samolyot chiptalarini ham yuborishdi. Ammo ketishimdan kursdoshlarim xafa bo‘lgan edi. Chunki men ketsam repertuardagi spektakllarni qayta sahnalashtirish kerak bo‘lardi. Aeroportga borganman-u, bir soatcha o‘ylab ortimga qaytganman. Menimcha, menda sodiqlik kuchli, agar shunday bo‘lmaganida Toshkentda qolishga qaror qilmagan bo‘lardim, deydi Dilfuza Ismoilova.
“Kelin pul olib kelsa, hammaga yoqadi”
— 1989-yili oila qurganman. 1990-yili esa to‘ng‘ich farzandim dunyoga kelgan. Afsuski, shunday kunlarning birida otam vafot etgan. O‘shanda oilamizga juda qiyin bo‘lgandi, chunki singillarim hali yosh, oilamizning boquvchisi esa olamdan o‘tdi. Hamma narsadan hafsalam pir bo‘lib yurganida qaynonam teatrga ishga kirishim kerakligini aytgan. Avvaliga ishlashni xohlamaganman, chunki otamning o‘limi juda og‘ir taʼsir qilgandi. Oxiri rozi bo‘lib, Abror Hidoyatov nomidagi teatrga ishga qabul qilinganman. Ikki yilga yaqin ishladim, ammo oladigan oyligimdan hech ko‘nglim to‘lmasdi. Shunda mashina oldi-sotdisiga qiziqib qoldim. Sarmoya kiritib, mashinani olib, u yer bu yerini tuzatib qayta sotardim. Juda yaxshi foyda qolardi, kelin pul olib kelsa hammaga yoqadi. Xursand bo‘lib, ishimni qo‘llab-quvvatlashardi, deydi Dilfuza Ismoilova.
“Ssenariyni 50 yilda ham yodlolmayman”
Dilfuza Ismoilovaning tanilishida “Gap yo‘q” jamoasining hissasi katta. Uning takrorlanmas rollari ham aynan ana shu jamoa bilan birgalikda yaratilgan.
— Rejissyor To‘xtamurod Mahkamov bilan tanishishimga Olimjon aka sababchi bo‘lgan. Hammamiz bir maktabda o‘qigan, oldinma keyin sanʼat institutini tamomlagan talabalar edik. To‘xtamurod Mahkamov rol berishda insonning feʼl-atvorini ham hisobga oladigan, samimiyatni yaxshi ko‘radigan inson edi. Tabiatan bitta kamchiligim bor, buni hech to‘g‘rilay olmadim. Ertalab uyg‘onishim juda qiyin, uyg‘ongan taqdirimda ham rolni ijro etolmayman. To‘xtamurod aka shuni bilib atayin men bilan bog‘liq sahnalarni tushdan keyin olardi. Ssenariyni oldindan ko‘rmasdim, shu bois To‘xtamurod aka o‘sha yerda shoshib o‘qib berardi. Bitta ssenariyni 50 yilda ham yodlay olmayman, ammo gapirib berishsa tezda yodimda qoladi. Aslida ssenariyda sigir sudrab ketishi-yu, poyezd tepasida yugurish bilan bog‘liq sahnalar bo‘lmagan. Hammasi suratga olish maydonchasida tasodifan yaratilgan. To‘xtamurod Mahkamov operatorga “Indamay olaver, Dilfuzaning o‘zi rolni qoyillatadi”, derdi. Haqiqatan ham besh daqiqadan keyin qanday xatti-harakatni qilishimni bilmasdim. Hammasi “motor” deyilganida yaratilardi, deydi Dilfuza Ismoilova.
Kuniga 15 martalab kuylanadigan “Toshkentning sho‘x qizi”
Dilfuza Ismoilovaning qo‘shiq kuylashi tomoshabinlar uchun kutilmagan yangilik bo‘lgan. Uni ko‘pchilik xonanda sifatida tan olmagan va tanqid toshlarini otgan. Shunday bo‘lsa-da, u “Toshkentning sho‘x qizi” qo‘shig‘i bilan o‘z muxlislarini topgan.
Mazkur qo‘shiq 2000-yilda Dilfuza Ismoilova g‘oyasi, Tohir Muhammad so‘zi asosida yaratilgan. Mazkur qo‘shiqdan so‘ng xonandaga omad kulib, to‘ylarining keti uzilmay qoldi.
— Yigirma yildan buyon “Toshkentning sho‘x qizi” qo‘shig‘ini kuniga kamida 10-15 marotaba ijro etaman. Kuniga 4-5 ta “birrov”im bo‘lsa, har bir to‘yda kamida ikki-uch marta ijro etishimni so‘rashadi. Eng quvonarlisi, qo‘shiqni avval yoshlar so‘rardi, hozir 80 yoshli onaxonlar ham shu qo‘shiqqa raqsga tushyapti. Ovozi yo‘q deydiganlarga javobim — u eshakda ham bo‘ladi. Men oylab bitta qo‘shiq ustida ishlamayman, yarim soatda she’rni qo‘limga olib bitta aytib, studiyadan chiqib ketaman. Qo‘shiq ko‘ngildan chiqishi kerak, shundagina samimiy bo‘ladi. Ovozi yo‘q deydiganlarga aytar gapim 24 yildan buyon qo‘shiq aytib xalq xizmatida yuribman. Bitta chiqib, yo‘q bo‘lib qolmadim. Sanʼatda ovoz rol o‘ynamaydi, deydi Dilfuza Ismoilova.
“Ahmadboyga mashina berib kuydim”
2017-yilda ijtimoiy tarmoqlarda xonanda Dilfuza Ismoilova to‘y vaqtida Ahmadboyni duo qilayotgani tasvirlangan videolar paydo bo‘ladi. Qo‘shiqchi “Baxtimizga boy otamiz sog‘ bo‘lsinlar, umrlari uzoq bo‘lsin! Alloh sizni o‘z panohida asrasin. Boy otamizni yomon ko‘zlardan, yomon odamlardan xudo asrasin!”, deydi.
— Ahmadboyga pul bermaganman. Mashina bergandim. Mashinaga kuydim. U ham bir inson. Beayb parvardigor. Do‘stga ham, dushmanga ham aytadiganim — omadini bersin, deydi Dilfuza Ismoilova.
“Lo‘lilar qo‘shiqchilarga ko‘p pul beradi”
Dilfuza Ismoilova intervyularining birida lo‘lilarni yaxshi ko‘rishi, ular to‘yda aytilgan narxdan o‘n baravar ko‘p berishi haqida gapirgandi.
— Lo‘lilarning buyurtmasi bilan to‘ylariga boraman. Men ularni rosa hurmat qilaman, ularni yaxshi ko‘raman, mehmondo‘st bo‘lishadi. Buyurtma qilishadi, ular mard. Qancha berishini aytmayman, lekin o‘zimizning insonlardan o‘n baravar ko‘p to‘lashadi. Juda ham mard bo‘lishadi, ular meni yaxshi ko‘rishadi, men ham ularni yaxshi ko‘raman”, deydi xonanda.
“Turmushga chiqishga uyaldim”
Dilfuza Ismoilovaga arabistonlik shayxdan sovchi kelgani, u bir nechta chemodanda tilla va kiyimlarni sovg‘a qilib yuborgani, xonanda esa uni insonlarga tarqatib yuborgani haqida ham aytgandi.
— Bundan bir necha yil avval umraga borish juda qiyin bo‘lgan paytda biz Yulduz Usmonova bilan qadr kechasida umra qilib kelganmiz. O‘shanda savol-javobdan o‘tish rosa qiyin edi. Saudiyaning elchixonasiga suhbatga kirganimizda Naif degan yoshgina arab yigiti meni yoqtirib qolgan. O‘sha menga sovchi qo‘ygan. Umraga borganimizda ham menga alohida mashinalar qilib qo‘ygan. Lekin men hamma qatori avtobusda yurganman. Konsertlarimga tushgan, juda ko‘p sovg‘a-salomlar jo‘natgan. Undan keyin yana bordik, yana bir arab ko‘ngil qo‘yibdi. Undan ham chamadon-chamadon kiyimlar, brilliant va tilla taqinchoqlar keldi. Olmayman, dedim, chiroyli muomala bilan yo‘q dedim. Lekin qoyil qolganim, rad javobini aytsam ham, sovg‘alarini tashlab ketgan, ularning hammasini yaqinlarimga tarqatganman, birortasini o‘zim ishlatmaganman.
Sizga aytsam, hozirgacha yosh yigitlar yaxshi ko‘rib qolib, ikkinchi xotinlikka taklif qilyapti. Bilmadim, balki ular “Meni boqib yurar” deb o‘ylab sevgi izhor qilar. Men esa umuman xohlamayman. Kallamni ishlataman. Menda ham sevgi bor. U sevgi Allohga, yaqinlarimga. Men ikki insonning o‘rtasidagi sevgiga ishonmayman, bandasining sevgisi hech qachon boqiy bo‘lmaydi, deydi xonanda
“Qaynonam ham qo‘shiqchi bo‘lgan”
Xonanda shaxsiy hayotda omadi kulmagani turmush o‘rtog‘ining noto‘g‘ri qadami sabab uch bola bilan ajrashgani haqida so‘zlab bergan.
— Turmush o‘rtog‘im bilan ajrashib ketganimizga 18 yildan ko‘proq bo‘ldi. Turmush o‘rtog‘im kursdoshim edi. Juda ham tarbiyali, yaxshi inson bo‘lgan. San’atkorlar oilasiga kelin bo‘lib tushganman. Qaynonamga ham gap bo‘lishi mumkinmas. Qaynonam Nodira Ahmedova, qo‘shiqchi bo‘lgan.
Turmush o‘rtog‘im bilan ajrashishimga ularning noto‘g‘ri qadami sabab bo‘lgan. Qo‘pol bo‘lsa ham aytaman, men hech qachon harom narsani o‘zimga yaqinlashtirmayman. Mening bir odatim borki, yaqin insonim aldasa, hech qachon kechirmayman. Aybini kechirishim mumkin, lekin u odam men uchun yo‘q, deydi Dilfuza Ismoilova.
Dilfuza Ismoilova nima sababdan filmlarda rol ijro etmayapti?
— Film va seriallarga takliflar juda ko‘p bo‘ladi. Rad javobini beraman. Yaqinda mana, rejissyor Hilol Nasimov filmga taklif qildi. Qanaqa rol, desam, “ichadigan ayol” obrazi ekan. Ichib rol o‘ynar ekanman, yana qo‘limga kishan solib olib ketishar ekan. Bunaqa rolni o‘ynamayman. Million dollar bersa ham. Oyiga 100 ming dollar bersa ham, rozi bo‘lmayman. Men rol tanlaydigan aktrisaman, deydi u.
“Suv zavodim bor”
Dilfuza Ismoilova o‘g‘illarining ham san’atkor bo‘lishini istagandi. Ammo ularning qo‘shiqlari u qadar ommalashmadi. Hozir o‘g‘illari tadbirkorlik bilan shug‘ullanadi.
— Katta o‘g‘lim hovli qurib sotadi. Kichkina o‘g‘lim Sarvarning suv zavodi bor. Qo‘li qo‘liga tegmay ishlaydi, suv beshta filtrdan o‘tadi. Suv ham yerning tagidan olinadi, halol qilib ishlab chiqariladi. Mening ham besh xil suv zavodim bor, deydi aktrisa.
Yulduz Usmonova bilan oralariga sovuqchilik tushgani haqida
O‘zbekiston xalq artisti Yulduz Usmonova va xonanda Dilfuza Ismoilova bir paytlar bir-birini qattiq hurmat qilgan, yaqin dugonalar, ustoz-shogird edi. Ammo hozirgi paytda ularning o‘rtasiga sovuqchilik tushgan. Dilfuza Ismoilova intervyularidan birida ushbu sovuqchilikning sababini quyidagicha izohlagan:
— Hozir Yulduz opam bilan munosabatimiz yaxshi emas. Salom-aligimiz bor, lekin dardlashmaymiz. Yulduz opamning shunday xarakteri borki, ishonuvchan. Men ularga aytardim, hech qachon birovning gapiga ishonmang, deb. Odam ko‘zi bilan ko‘rishi, qulog‘i bilan eshitishi kerak. Men, masalan, birov menga birovni gapirib kelsa, ishonmayman. U odamni hurmat ham qilmayman, bor, deyman. Inson o‘ziga, aqliga, qulog‘iga, ko‘ziga ishonganidan keyin gapirishi kerak. U unaqa debdi, bu bunaqa debdi, degan gaplarga ishonib qoladigan odatlari bor edi. Unaqa bo‘lishi kerak emas. Yulduz opa juda ishonuvchan, shuning uchun ularga ishonmang hech kimga, degim keladi. Insonning ichini bilish juda qiyin. Toza do‘st topish juda qiyin. Oldilariga kim qanaqa niyatda keladi, Xudo biladi. Bizga hammaning havasi kelardi. Gadoning dushmani gado bo‘ladi. Men haqimda san’atkorlar ularga nima deyayotganini o‘z qulog‘im bilan eshitganman, deydi Dilfuza Ismoilova.
Dilfuza Ismoilova kun kelib, ustozi bilan munosabatlari yana avvalgidek bo‘lishiga ishonishini ham aytib o‘tgan.
“Vaqti keladi, hali yana dardlashib o‘tiramiz. O‘shanda ularga aytadigan gaplarim bor. Men ularga faqat yaxshilik tilayman. Chunki bunday insonlar boshqa tug‘ilishi qiyin”, deydi xonanda.
“Shu paytgacha 22 kishiga mashina tarqatibman”
Dilfuza Ismoilova o‘zbek shou-biznesidagi eng qo‘li ochiq xonandalardan biri ekanligi hech kimga sir emas. U yaqinlariga qimmatbaho sovg‘alarni ulashishni yaxshi ko‘radi.
— Bu maqtanish emas, inson jigarjon bo‘lishi kerak. Shunday insonlar borki, pul topadi, lekin na ota-onasiga, na opa-singlisiga hech narsa qilmaydi. Faqat o‘zini o‘ylaydi. Vaholanki qancha birovga pul bersangiz, shuncha pul kelaveradi. Shu paytgacha, opa-singlim, qarindosh-urug‘im va hatto quda-andalarimga ham jami 22 kishiga mashina sovg‘a qilibman, degan edi xonanda.
Izoh (0)