Qiyinchiliklarga qaramay, o‘z ishini boshlayotgan, o‘ziga ishongan va muvaffaqiyat sari intilayotgan ayollar jamiyatimizning muhim tayanch kuchidir. Ularning qat’iyati nafaqat oilalar farovonligini oshirishga, balki butun mamlakat taraqqiyotiga hissa qo‘shishga xizmat qiladi.
O‘zbekiston prezidentining ayollar tadbirkorligini qo‘llab-quvvatlash siyosati doirasida “Hamroh” dasturi ishga tushirildi. O‘zbekiston prezidenti yordamchisi Saida Mirziyoyeva ushbu tashabbus ayollarga biznes yuritish bo‘yicha zarur bilimlarni olish, tajribali murabbiylardan maslahat olish hamda imtiyozli kreditlar va grantlardan foydalanish imkoniyatini yaratishi haqida e’lon qildi.
“Hamroh” dasturidan ruhlanib, yanada olg‘a intilayotgan Gulmira Djumayeva bolaligida ishchilar uchun chalob sotgani, bir necha yil muhojirlikda qiynalgani va bugungi kunda qanday qilib katta tadbirkorga aylangani haqida hikoya qildi.
“Odamlarga chalob sotib katta bo‘lganman”
— Bolaligimda men yashaydigan joy — Kattaqo‘rg‘on tumanida poyezd yo‘lida ishchilar uchun bozor bo‘lardi. Yosh bo‘lishimga qaramay, chalob tayyorlab kelib, o‘sha yerda sotardim. Dadam oilada yetti kishini bir o‘zi boqardi.
Rossiyada ko‘cha supurgan paytlarim ham bo‘lgan. Cho‘ntagimga ozgina non solib, choy damlab olardim. Yo‘lning bir chekkasiga o‘tirib ovqatlanardim. U narsalarni eslash juda og‘ir, oila sog‘inchi…
Qarindosh-urug‘larim, do‘stlarim sen chiqindi bilan ishlayapsan, yaxshi ish qilmayapsan deb mendan xafa bo‘lardi. Shundan so‘ng to‘y-ma’raka, yig‘inlarga ham bormaganman. Meni taklif qilishganda ham rad etardim. Odamlar ustimda kular, hatto qo‘li bilan meni ko‘rsatishardi, deya hikoya qiladi u.
“Bugun qo‘l ostimda yuzlab insonlar ishlaydi”
— Chet elda ishlayotganlar u yerdan g‘oyalar olishi kerak. Tajribalarni O‘zbekistonga olib kelishsa, bajarish bizning odamlarning qo‘lidan keladi. Faqat o‘sha kasbni o‘rganish kerak. Nima uchun men mehnat muhojiri bo‘lib yuribman-u, nega endi O‘zbekistonga borib shu yutuqni qilolmas ekanman? Ular mingan mashinani nega men minolmayman, degan savollarni o‘zimga berganimda turmush o‘rtog‘im ustimdan kulgan payti ham bo‘lgan. Mening shu savollarim bugungi yutug‘imning egasi bo‘ldi.
Hozir chiqindini qayta ishlash bilan shug‘ullanaman. Bugungi kunda shu sohada uchta tuman klasteriman. Chiqindilar qayta ishlansa — ular O‘zbekistonning boyligi. Qo‘l ostimda 426 nafar inson faoliyat yuritadi. Ulardan 123 tasi “temir daftar”da turadigan, imkoniyati cheklangan ayollar. Ishchilarim bilan bitta stolda o‘tirib ovqatlanishni yaxshi ko‘raman — tushlikda ular bilan bir stolda o‘tiraman. Ularning dardini, qanday muammosi borligini eshitaman, deydi Gulmira Djumayeva.
“Pul osonlik bilan kelmaydi, ortga chekinmaslik lozim”
— Hozir Kattaqo‘rg‘on shahrida ham, tumanda ham birorta chiqindi ko‘rmaysiz. Bitta tushgan chiqindi darhol yig‘ishtirib ketiladi va bizning zavodga yetkaziladi. Bugun oddiy shishani qayta ishlayman — drobilka orqali maydalab, yig‘ib, yetkazib beraman. Metallni qayta ishlashda kseroksdan foydalanaman. Barcha plastmassani qayta ishlab, granula tayyorlayman. Qop, metall va plastikni qayta ishlayman. Yetti xil turdagi qayta ishlaydigan mahsulotlarim bor.
Ayollar bugungi kunda qiyinchilikdan ortga chekinmasliklari kerak. Xotin-qizlarga bugun juda keng imkoniyat va sharoitlar bor. Pul o‘z-o‘zidan kelib qolmaydi. Qiyinchilikni sabr bilan yengsa albatta, hammasi o‘z o‘rniga tushadi. Orqaga chekinmaslik lozim — ishlash kerak. Bugun ziyon qilsa, ertaga foyda qiladi. Agar ertaga ham ziyon bo‘lsa, indinga albatta, foyda ko‘radi, deydi tadbirkor.
“Hamroh” mening olg‘a intilishimga kuch beryapti”
— Boshlanishidagi barcha qiyinchiliklarni oilam bilan birgalikda yengib o‘tdim, ularni ham to‘g‘ri ishlarga yo‘naltirdim. Bugun erimning oilasi ham, o‘zimning opa-singil, ukalarim — hammasi yaxshi yashaydi. Barchasining “inomarka” mashinasi bor.
Hozirda O‘zbekistonimizda hamma sharoit bor! Menda “Shu qiyinchiliklardan o‘tib olsam, barchasi yaxshi bo‘lib ketadi” degan gap xayolimda turardi. Yotsam ham, tursam ham shu haqida o‘ylardim. O‘sha qiyinchiliklarga chidadim, sabr qildim — mana bugun rohatini ko‘ryapman.
Shunday vaqt bo‘ldi-ki, ozroq qiynalib turgan paytimda 500 million kredit so‘radim. Xalq banki tomonidan menga shu summa ajratib berildi. “Hamroh” esa mendan qiyinchilik, menga qanday yordam berilsa yana mingta ish o‘rni yaratilishini so‘radi. “Hamroh”dek tashkilotlar yanada oldinga yurishimga ruhan kuch beryapti, deydi chiqindini qayta ishlash korxonasi rahbari Gulmira Djumayeva.
Izoh (0)