Marg‘ilon shahrida temiryo‘ldan o‘tib ketmoqchi bo‘lgan Nexia-3 ni yuk poyezdi urib yubordi. Hodisadan so‘ng aks etgan videolar ijtimoiy tarmoqlarda tarqaldi.
Bosh prokuratura axborot xizmati rahbari Hayot Shamsutdinovning “Daryo”ga ma’lum qilishicha, voqea 19-fevral kuni soat 22:35 larda yuz bergan. Qo‘qon lokomotiv deposiga qarashli, Axtachi—Qo‘qon yo‘nalishidagi yuk poyezdi tarkibida 102 ta bo‘sh vagon bilan harakatlanayotganida qo‘riqlanadigan temiryo‘l kesishmasidan o‘z ehtiyotsizligi oqibatida o‘tib ketayotgan Nexia-3 ni urib yuborib, to‘xtagan.
Hodisa natijasida 38 yoshli haydovchi A.Y. bosh va qo‘l qismidan yengil jarohat olgan va Marg‘ilon shahar Tez tibbiy yordam markaziga yuborilgan. Avtomobil texnik shikastlangan.
Ayni paytda Farg‘ona viloyati transportda xavfsizlikni ta’minlash boshqarmasi TB tomonidan tergovga qadar tekshiruv olib borilmoqda.
2024-yilning dekabrida Toshkent viloyatidagi Dalaguzar—Nazarbek temiryo‘l kesishmasida Damas’ni poyezd urib yuborgandi. Buxoroda 2023-yilning aprelida poyezd Lacettiʼni, o‘sha yilning iyunida Shacman yuk mashinasini urib yuborgandi.
Izoh (0)