Avtomobil sanoati yillar davomida hayratlanarli ixtirolarga boyib bormoqda. Noodatiy avtomobillarni ishlab chiqarish uchun esa nafaqat zamonaviy texnologiya, balki chuqur muhandislik va dizaynerlik tasavvuri ham kerak bo‘ladi. Ushbu maqolada mashinalar haqidagi tasavvuringizni o‘zgartirib yuboradigan eng g‘ayrioddiy 10 ta avtomobillar haqida ma’lumot beramiz.
Amber elektrokari
MAMI va Avtotor kompaniyalari hamkorligida ishlab chiqilgan mazkur elektromobilning prototipi 2023-yil dekabr oyida taqdim etilgan bo‘lib, dizayni va texnik xususiyatlari turli munozaralarga sabab bo‘lgan. Ijtimoiy tarmoq foydalanuvchilari avtomobilni jiddiy qabul qila olmadi va hazillar memlar qahramoniga aylandi.
Nissan Hyper Force
Nissan Hyper Force — bu Nissan kompaniyasining kelajakdagi eng ilg‘or elektr superkari bo‘lib, 2023-yil Yaponiyada bo‘lib o‘tgan avtomobil ko‘rgazmasida taqdim etilgan. U 1 000 kVt (taxminan 1 341 ot kuchi) quvvatga ega va barcha g‘ildiraklardan tortish tizimi va uglerod tolalardan ishlangan yengil kuzov bilan jihozlangan. Hyper Force ikki xil rejimda boshqariladi:
“R” (Racing) — poyga rejimi: bunda ichki yoritish tizimi qizil rangga o‘zgaradi, haydash paneli minimalistik dizaynga o‘tadi va poyga uchun optimal sozlamalar ishlay boshlaydi;
“GT” (Grand Touring) — uzoq safar rejimi: Barcha chiroqlar ko‘k rangga kiradi, avtomobil qulayroq boshqaruv va uzoq masofali sayohatlar uchun moslashtiriladi.
Nissan Hyper Punk
Nissan Hyper Punk — bu Nissan kompaniyasining 2023-yilda Yaponiyada bo‘lib o‘tgan Mobility Show ko‘rgazmasida taqdim etilgan elektr krossover bo‘lib, innovatsiyalarni qadrlovchilar uchun mo‘ljallangan. Avtomobil sun’iy intellekt va bosh suyanchiqlariga o‘rnatilgan biosensorlar orqali haydovchining kayfiyatini aniqlaydi va unga mos musiqa va yoritish tizimini tanlaydi, bu esa haydovchining energiyasi va ijodkorligini oshiradi. Doimiy internet ulanishi va foydalanuvchilarning qurilmalari bilan integratsiyasi tufayli, Hyper Punk mobil ijodiy studiya sifatida xizmat qilishi mumkin.
Tesla Cybertruck
Tesla Cybertruck futuristik elektr pikapi 2019-yilda taqdim etilgan va 2023-yil noyabr oyida ishlab chiqarila boshlagan. Uning o‘ziga xos dizayni zanglamaydigan po‘latdan yasalgan tekis panellardan iborat bo‘lib, uning eng kuchli versiyasi “Cyberbeast” barcha g‘ildiraklardan tortish tizimli uch motorga ega.
Cybertruck zamonaviy 816 V litiy-ion batareyasi bilan jihozlangan bo‘lib, 240 V da 11,5 kVt quvvat bilan zaryadlash yoki 800 V da 350 kVtgacha tezkor zaryadlash imkoniyatiga ega.
Volkswagen Type 2 asosidagi g‘ildirakli uy
Ikki mikroavtobusni birlashtirish g‘oyasiga nima deysiz? Volkswagen Type 2 bazasidagi g‘ildirakli uy sayohat va yashash uchun mo‘ljallangan transport vositasidir. Bu turdagi avtomobillar ayniqsa 1950–1980-yillarda mashhurlik kasb etgan va hozirgacha klassik camper furgonlar sifatida qadrlanadi.
XEV Yoyo
XEV Yoyo bu Xitoyda ishlab chiqarilgan bo‘lib, asosan tirband shahar ko‘chalari bo‘ylab harakatlanish uchun mo‘ljallangan kichik elektr avtomobili. U 2021-yildan boshlab sotuvda va uning barcha qismlari 3D printerda chop etilgan. Salonga ikki kishidan ortiq odam sig‘maydi.
Tango T600
Tango T600 AQShning Commuter Cars kompaniyasi tomonidan ishlab chiqarilgan noyob elektromobil bo‘lib, o‘zining tor va baland dizayni bilan ajralib turadi.
Tango T600 ning eni atigi 99 santimetrni tashkil etadi, bu esa uni dunyodagi eng tor avtomobillardan biriga aylantiradi. U 600 kVt (taxminan 800 ot kuchi) quvvatga ega bo‘lib, 0 dan 100 km/soat tezlikka atigi 4 soniyada erishadi. Uning maksimal tezligi 240 km/soatni tashkil etadi. Yigirmata nusxada ishlab chiqarilgan Tango T600 ning biri aktyor Jorj Kluniga tegishli.
Rolls-Royce boat tail
Rolls-Royce Boat Tail millionerlar uchun yaratilgan haqiqiy san’at asari. U dunyodagi eng qimmat avtomobillardan biri hisoblanib, faqat 3 dona nusxada ishlab chiqarilgan. Har bir nusxasi mijozning shaxsiy xohishlariga mos ravishda qo‘lda o‘zgartirilgan Rolls-Royce Boat Tail narxi 28 million dollar atrofida baholanadi.
Bahaybat Hummer
Hummer — bu o‘zining katta o‘lchami, mustahkamligi va yuqori quvvati bilan mashhur bo‘lgan avtomobil brendi. Ammo siz ikki qavat uy balandligidagi Hummer’ni ko‘rganmisiz? Ushbu avtomobilning egasi Birlashgan Arab Amirliklaridagi shayx Hamad bin Hamdan Al Nahayondir.
Izoh (0)