Chevrolet kompaniyasi Spark avtomobilining yangilangan modeli — Spark EUV krossoverini ishlab chiqdi. Bu haqda Braziliyada o‘tkazilgan yangi avtomobil taqdimoti vaqtida ma’lum bo‘ldi.
Mazkur model Janubiy Amerika bozori uchun mo‘ljallangan bo‘lib, Xitoyda GM va SAIC kompaniyalari hamkorligida ishlab chiqilgan Baojun Yep Plus avtomobilining Chevrolet brendi ostidagi versiyasidir.
Dizayni bo‘yicha Chevrolet Spark EUV asosan Baojun Yep Plus’ni eslatib yuboradi, ularning yagona farqi logotip va brend belgilaridadir. Model kvadrat shakldagi kuzov, keng bamperlar, LED faralar, vertikal orqa chiroqlar va yon tomonga ochiladigan yukxona eshigi bilan ajralib turadi.
Yangi Chevrolet Spark EUV avtomobilida “Active” yozuvi mavjud bo'lib, u maxsus konfiguratsiyani bildiradi.
Uning texnik xususiyatlar hali rasman e’lon qilinmagan, ammo donor model Baojun Yep Plus old g‘ildirak harakatlantirish tizimi va 102 ot kuchiga ega motor bilan jihozlangan. Model 41,9 kVt/soatli akkumulyatorga ega bo‘lib, CLTC (China Light-Duty Vehicle Test Cycle) sinovlariga ko‘ra 401 kilometr masofani bosib o‘ta oladi.
Avto ekspertlarning qayd etishicha, yangi Spark katta ehtimol bilan elektromobilga aylanadi.
Izoh (0)