O‘zbekistondan Qozog‘istonga 1,2 million dollar noqonuniy olib chiqilishiga chek qo‘yildi.
Davlat xavfsizlik xizmati xodimlari tomonidan bojxona idoralari bilan hamkorlikda Toshkent viloyatining Toshkent tumanida joylashgan “Navoiy” chegara-bojxona postida tezkor tadbir o‘tkazilganda qo‘shni davlat tomon harakatlanayotgan Lacetti to‘xtatilib, xolislar ishtirokida ko‘zdan kechirilganda, unda yo‘lovchi sifatida ketayotgan, Toshkent tumanida yashovchi, 1978-yilda tug‘ilgan fuqaroga tegishli sellofan paketda 874 ming AQSH dollari borligi ma’lum bo‘lgan.
Aniqlanishicha, u mazkur pul mablag‘ini deklaratsiyasiz, bojxona nazoratidan yashirib, Qozog‘istonga olib o‘tmoqchi bo‘lgan.
Shuningdek, tezkor tadbir davom ettirilib, ushbu xorijiy valyutalarni Toshkent shahridagi bozorlarda savdo qiluvchi shaxslardan yig‘ib, mazkur ayolga bergan — poytaxtda istiqomat qiluvchi, 1989-yilda tug‘ilgan fuqaroning Toshkent tumanidagi vaqtincha yashash xonadoni ko‘zdan kechirilganda, kelgusida Qozog‘istonga olib o‘tish uchun tayyorlab qo‘yilgan 399 ming 170 AQSH dollari borligi ham aniqlangan.
O‘tkazilgan tezkor tadbir davomida jami 1 million 273 ming 170 AQSH dollari ashyoviy dalil sifatida olingan.
Hozirda mazkur shaxslarga nisbatan Jinoyat kodeksining 25,182-moddasining (bojxona to‘g‘risidagi qonunchilikni buzish) 2-qismi “a” bandi bilan jinoyat ishi qo‘zg‘atilib, qamoq ehtiyot chorasi qo‘llanildi. Tergov harakatlari olib borilmoqda.
Chegaradan noqonuniy olib o‘tish holatlari
2025-yil 31-yanvar kuni kuni Farg‘onada 483 million so‘mlik zargarlik buyumlarini yashirib olib kirilishiga chek qo‘yildi. 10-fevral kuni Turkmanistondan O‘zbekistonga 1,3 mlrd so‘mlik dizel noqonuniy o‘tkazilayotganda to‘xtatib qolindi.12-mart kuni Buxoroda tarixiy tangalar va ko‘krak nishonlarini yashirincha Rossiyaga olib ketayotgan shaxs ushlandi. 14-mart kuni Toshkent shahridagi “Sergeli” bojxona posti orqali avto ehtiyot qismlari sifatida olib o‘tilmoqchi bo‘lgan yuk, aslida butun samosval bo‘lib chiqdi.
Izoh (0)