O‘zbekiston tovar-xomashyo birjasi 2024-yilda sotilgan “chiroyli” avtomobil raqamlarini asosan jismoniy shaxslar sotib olganini maʼlum qildi.
Bu haqda “O‘zbekiston respublika tovar-xom ashyo birjasi” aksiyadorlik jamiyatida o‘tkazilgan matbuot anjumanida aytilgan. 2024-yilda 195 mingdan ziyod avtoraqamlar onlayn auksionlar orqali sotilgan.
Sotilgan avtoraqamlarning 97 foizi jismoniy shaxslar, 3 foizi yuridik shaxslar tomonidan xarid qilingan. Sotilgan avtoraqamlarning eng past bahosi 1,7 mln so‘mni, eng qimmat avtoraqamning qiymati esa 965,3 mln so‘mni tashkil qildi.
Shuningdek, ko‘rib chiqilayotgan davrda birja orqali umumiy qiymati 875,9 mln so‘mdan ortiq bo‘lgan qariyb 64,3 mingta “yashil sertifikatlar” sotilgan. Birjada savdo ishtirokchilari uchun qo‘shimcha qulayliklar yaratish maqsadida ikki tomonlama qarama-qarshi auksioni ishga tushirildi.
Ikki tomonlama qarama-qarshi auksion birjaning savdo rejimi bo‘lib, bozor narxlarini aniqlashning yanada samaraliroq usuli hisoblanadi. Mazkur savdo rejimida ikki tomon bir vaqtning o‘zida o‘z narx takliflarini berishlari mumkin. Buning natijasida raqobat nafaqat xaridorlar balki sotuvchilar o‘rtasida ham kuchayib boradi.
Birja savdosining yangi rejimi birja savdolari samaradorligini oshirish va tovar bozorlarida raqobat muhitini rivojlantirishga xizmat qiladi.
Yuqori narxga sotilgan “chiroyli” avtoraqamlar
Bundan avval avtoraqamlar onlayn auksionida sotuvga qo‘yilgan 01 888 BBB avtoraqami 965 million 250 ming so‘mga sotilgani haqida xabar berilgandi. Dastlab 337 million 500 ming so‘m boshlang‘ich narx bilan savdoga qo‘yilgan bu avtoraqamning narxi auksion tugash vaqtiga qadar 965 million 250 ming so‘mga ko‘tarilgan.
Eslatib o'tamiz, O‘zbekistonda 2023-yilda onlayn auksionlar orqali 87 mingdan ziyod avtoraqamlar sotilgandi. Sotilgan avtomobil raqamlarining jami qiymati 396,1 milliard so‘mni tashkil etgan. Eng qimmat “chiroyli” avtoraqam yuridik shaxsga 450 million so‘mga sotilgan.
Izoh (0)