Toshkent viloyatining 7 ta shahrida brutto-shartnoma asosida 21 ta yo‘nalishiga 170 ta yangi avtobusni xarid qilinishi belgilandi, deb xabar bermoqda viloyat hokimligi matbuot xizmati.
-pC61nL7m.jpg)
Qayd etilishicha, bu borada tadbirkorlar tanlovlar asosida aniqlanib, Angren shahridan ro‘yxatdan o‘tgan “Angren avto group” MCHJ tomonidan Xitoydan 15 ta Yutong avtobusni bank krediti asosida xarid qilish bo‘yicha shartnoma imzolandi. Avtobuslar yaqin kunlarda olib kelinib, foydalanishga topshiriladi.
Olmaliq shahridan ro‘yxatdan o‘tgan “Olmaliq trans service” MCHJ tomonidan esa 83 ta avtobus xarid qilish borasida Xitoyda avtobus ishlab chiqaruvchi kompaniya bilan shartnomalar imzolashga kelishilgan.
“Eng asosiysi, mazkur xarid qilinadigan zamonaviy avtobuslarda yo‘lovchilarga yanada qulaylik yaratish maqsadida, shahar jamoat transportida avtomatlashtirilgan elektron to‘lov tizimi tatbiq etish ko‘zda tutilgan”, deyiladi hokimlik xabarida.
Ma’lum qilinishicha, 2025-yilda jamoat transporti yetib bormagan hududlarni qamrab olgan holda 12 ta yangi yo‘nalish tashkil etiladi. Shuningdek, avtotransportlarni dispetcherlik markaziga integratsiya qilish hamda shahar avtobus yo‘nalishlarida avtomatlashtirilgan to‘lov tizimini to‘liq yo‘lga qo‘yiladi.
Zoir Mirzayev 2024-yil oktyabrida o‘tkazgan hokimlik soatida Toshkent viloyatida transport sohasidagi xizmatlarni yaxshilash uchun 1000 ta yangi avtobus xarid qilish bo‘yicha topshiriq bergandi.
Transport vazirligi matbuot xizmatining bildirishicha, hududlarda aholiga ko‘rsatilayotgan transport xizmatlari sifatini yaxshilash maqsadida zamonaviy avtobuslarni olib kelish ishlari davom etmoqda. Toshkent shahriga yana 1000 ta Yutong avtobuslarini olib kelish imkoniyatlari o‘rganilmoqda. Andijon viloyatiga Xitoydan 100 ta elektrobus xarid qilinishi rejalashtirilgan.
Izoh (0)