Xitoyning BYD konglomerati dunyodagi eng yirik avtomobil tashuvchi kema — “Shenzhen” ni suvga tushirdi. Kompaniya asos solingan shahar nomi bilan atalgan kema Shanxayning shimoli-g‘arbidan uch soatlik masofada joylashgan Yangjou portiga tushdi.
Kemaning uzunligi 219 metr, kengligi 37,7 metrni tashkil qiladi. U bir vaqtning o‘zida 9200 tagacha avtomobilni tashishi mumkin.
Shenchjendagi avtomobil ishlab chiqaruvchi kompaniya 2024-yil yanvar oyida BYD Explorer nomli avtomobil tashuvchi kemani ishga tushirgan edi. So‘ng dekabr oyida Changzhou kemasi bortida 5000 ta elektromobil bilan Yevropaga yo‘l olgan. 2025-yil boshida esa BYD kompaniyasi 7000 ta avtomobil sig‘imiga ega Hefei kemasini foydalanishga topshirgan.
Kuni kecha sudnoga tushirilgan BYD Shenzhen — transport vositalarini tashish uchun mo‘ljallangan to‘rtinchi va hozirda dunyodagi eng katta kema. Kompaniya 2026-yilgacha Yevrosiyo va Shimoliy Amerika mamlakatlariga avtomobillar eksport qiladigan yana sakkizta kemani ishlab chiqarishni rejalashtirgan.
BYD rasmiy saytida ma’lum qilinishicha, Shenzhen dunyodagi eng xavfsiz va ekologik toza kemadir. U bir vaqtning o‘zida elektr energiyasi, suyultirilgan gaz yoki kema yoqilg‘isi bilan ishlay oladi. Shuningdek, Shenzhen BYD ga tegishli akkumulyatorlar bilan jihozlangan birinchi kemadir.
BYD kompaniyasi 2024-yilda dunyo bo‘ylab 417 204 ta elektromobilni eksport qildi, bu ko‘rsatkich 2023-yilga nisbatan 71,9 foizga ko‘pdir. 2024-yilda kompaniya butun dunyo bo‘ylab 4,25 million avtomobilini sotgan. Ayni paytda kompaniya savdosining 10% ga yaqinini eksport tashkil etadi.
Izoh (0)