Film va seriallar tufayli butun dunyoga mashhur bo‘lgan avtomobillar (foto)

Mashhur filmlar va seriallardagi eng xarizmatik avtomobillarni eslaymiz — ularning barchasi aynan filmlar ekranlarga chiqqandan keyin ramziy ahamiyat kasb etdi.

“Kelajakka qaytib” — DeLorean DMC-12

“Kinodagi eng zo‘r mashina” deganda xayolga keladigan birinchi narsa DeLorean DMC-12 bo‘lsa kerak. Avtomobil Dok tomonidan “Kelajakka qaytib” filmida vaqt bo‘ylab sayohat qilish uchun qayta jihozlangan.

“Garri Potter va maxfiy hujra” — Ford Anglia 105E Deluxe

Uchar Ford bosh qahramonlarni bir necha bor mushkul ahvoldan qutqarib qolgan: unda Garri Dursllar xonadonidan qochishga muvaffaq bo‘lgan, uning yordamida Ron ikkalasi Xogvartsga yetib borgan, 9/34 platformasiga kirish yo‘li to‘satdan yopilib qolgan va aynan u bolalarni Taqiqlangan o‘rmondagi o‘rgimchaklar galasidan qutqarib qolgan. Uchish qobiliyatidan tashqari, avtomobil ko‘rinmas bo‘lib qolishi ham mumkin edi.

“Forsaj” — Dodge Charger

Agar “Forsaj” filmlar seriyasini ko‘rgan bo‘lsangiz, Dominik Torettoga otasidan meros qolgan 1970-yilgi Dodge Chargerni eslay olasiz. 2000 ot kuchidan ortiq quvvatga ega hashamatli qora avtomobil birinchi qismda dahshatli avariyaga uchragan. Ammo “Forsaj”ning to‘rtinchi, so‘ngra yettinchi qismida yana ekranlarga qaytgan.

“Taksi” — Peugeot 406

Fransiyalik tezyurar taksi haydovchisi haqidagi filmdagi asosiy rollardan biri Peugeot 406 sedaniga nasib etdi. Avtomobil oddiy taksi mashinasidan og‘ir va kuchli dvigatelli poyga avtomobiliga aylanishi mumkin edi.

“I operatsiyasi va Shurikning boshqa sarguzashtlari” — SMZ S-3A

“I operatsiyasi va Shurikning boshqa sarguzashtlari” sovet filmida Vitsin, Morgunov va Nikulin usti ochiq kichik mashinada yurishgan — gap SMZ S-3A avtomobili haqida bormoqda. Aslida bu 1960-yilda Serpuxovskiy mototsikl zavodida ishlab chiqarilgan motokolyaska. Xalq orasida uni “Morgunovka” deb atashardi. Motokolyaskaning quvvati 10 ot kuchi va maksimal tezligi 60 km/soat edi.

“Yura davri parki” — Ford Explorer

Ford “Yura davri parki” filmini suratga olgan kinostudiya bilan shartnoma imzolash uchun qo‘lidan kelganini qildi. Va u yanglishmadi — bu eng samarali reklama bo‘ldi: Stiven Spilberg filmi chiqqanidan so‘ng Ford Explorer yo‘ltanlamas butun dunyoga tanildi.

“Arvoh ovchilari” — Cadillac Miller-Meteor

60-yillarda haqiqiy hayotda Cadillac Miller-Meteor asosan dafn marosimi va tez tibbiy yordam mashinasi sifatida foydalanilgan. “Arvoh ovchilari” filmi rejissyori Ayvan Raytman aynan shunday o‘tmishga ega avtomobil yovuz kuchlardan aziyat chekayotganlarga yordamchi bo‘lishi kerak, degan xulosaga keladi. Quvurlar va qo‘shimcha jihozlar mashinaga o‘ziga xos joziba baxsh etgan.

“Ahmoq va undan ham ahmoq” — Ford Econoline

It ko‘rinishida bezatilgan mikroavtobus — “Ahmoq va undan ham ahmoq” filmidagi Garri va Lloydning avtomobili. Unda do‘stlar aeroportda “yo‘qotilgan” chamadonni qaytarish uchun Aspenga yo‘l olishgan.

Bu avto shunchalik mashhurki, 1960-yildan buyon ishlab chiqarilmoqda va hozirga qadar ushbu mikroavtobuslarning to‘rt avlodi mavjud. Filmda uchinchi avlod modeli tasvirlangan. Uning kuzovi ustiga yopinchiqqa o‘xshash narsa kiydirilgan: “it”ning quloqlari yuqori tezlikda kulgili tarzda hilpiraydi, mashinaga yonilg‘i quyish uchun esa uning orqa oyog‘ini ko‘tarish kerak bo‘ladi.