Joriy yilda Mercedes-Benz kompaniyasi avtomobillarni ishlab chiqarish bo‘yicha mutlaqo o‘zgacha yondashuvni ilgari surishga qaror qildi. Bundan avval kompaniya avvaliga benzinli modeldagi avtomobillarni ishlab chiqarib, so‘ng ularni elektrlashtirishni yo‘lga qo‘yar edi. Endilikda kompaniya yangi CLA avtomobilini birinchi bo‘lib elektr versiyasida, keyin esa gibrid modifikatsiyada taqdim etishni lozim topdi.
Yangi CLA ko‘plab funksiyalarga ega MMA (Mercedes Modular Architecture) platformasiga asoslangan bo‘lib, “birinchi navbatda elektromobillar” tamoyili ostida ishlab chiqilgan. Bunday metod Mercedes kompaniyasiga ishlab chiqarish xarajatlarini kamaytiradi va xaridorlarga bir kuzovda elektr, gibrid yoki benzinli dvigatellar o‘rtasida tanlov taklif qilish imkonini beradi.
“Biz ishlab chiqarilayotgan mashinalarning aksariyat qismini elektrlashtirishga intilyapmiz, ammo 2025-yilda bu 100% ko‘rsatkichni tashkil etmasligi aniq. Bizda asosan dualizm ustunlik qiladi”, deydi Mercedes-Benz Group bosh direktori Ola Kallenius Shtutgartda bo‘lib o‘tgan taqdimotda.
Yangi CLA o‘zining masofa bosib o‘tish zaxirasi bilan hayratda qoldiradi. Uning akkumulyatori 85,5 kVt/soat quvvatga ega bo‘lib, WLTP standarti bo‘yicha taxminan 790 kilometr masofa bosib o‘tilishni ta’minlaydi. Uning yonilg‘i samaradorligi 560 kilometrni tashkil qilsa-da, CLA avtomobili Tesla bilan birgalikda bozordagi yetakchi avtomobillar ro‘yxatiga kirishi bashorat qilinmoqda.
Mercedes-Benz CLA elektromobilida OneBox deb nomlangan yangi tormoz tizimi joriy etilgan. Ushbu tizimda ilgari alohida bo‘lgan komponentlar, masalan, tormoz kuchaytirgichi, bosh tormoz silindri va ESP nazorati, bitta ixcham modulga birlashtirilgan. Bu yechim tormoz energiyasini rekuperatsiya qilish (tormozlash paytida energiyani qayta tiklash)ni optimallashtirib, elektr yurish zaxirasini maksimal darajada oshirishga yordam beradi.
OneBox tizimi tormozlash paytida rekuperatsiyadan gidravlik tormoz tizimiga o'tishda silliq va tezkor reaksiyalarni ta’minlaydi. Bu esa haydash tajribasini yaxshilaydi va samaradorlikni oshiradi.
Ushbu innovatsion tormoz tizimi Mercedes-Benz’ning yangi Mercedes Modular Architecture (MMA) platformasida ishlab chiqilgan bo”lib, kelajakdagi elektr transport vositalarida ham qo‘llanilishi kutilmoqda.
Shuningdek, Mercedes-Benz CLA elektromobili zamonaviy zaryadlash texnologiyalari bilan jihozlangan, u qulay va tezkor zaryadlash imkoniyatlarini taqdim etadi. 250 kVt quvvatli DC zaryadlash stansiyasida, atigi 10 daqiqalik zaryadlash orqali 300 kilometrgacha masofani bosib o‘tish uchun yetarli energiya olish mumkin.
Mercedes-Benz CLA elektromobilining bort qismida “Superscreen” deb nomlangan keng sensorli ekran mavjud bo‘lib, u yo‘lovchilarga video o‘yinlar o‘ynash yoki Netflix tomosha qilish imkonini beradi. Bu tizim Mercedes-Benz'ning yangi MB.OS operatsion tizimi asosida ishlaydi.
Agar mashina harakatlanayotgan bo‘lsa, o‘yin o‘ynash yoki video tomosha qilish faqat yo‘lovchilar uchun mavjud bo‘ladi, haydovchi uchun esa xavfsizlik nuqtai nazaridan bunday funksiya bloklanadi.
Mercedes-Benz ushbu o‘yin funksiyasini bulut texnologiyasi orqali qo‘llab-quvvatlaydi, bu esa real vaqtda o‘yinlarni yuklab olish va o‘ynash imkonini yaratadi.
Elektr CLA (bazaviy versiya with EQ Technology CLA 250+ deb ataladi) birinchi o‘rinda Xitoy va Yevropada paydo bo‘ladi va 2025-yilning kuzida AQSh bozorlariga chiqadi.
Mercedes yangi CLA narxini hali e’lon qilgani yo‘q, biroq joriy iqtisodiy sharoit va kengaytirilgan funksiyalarni hisobga olgan holda, yangi elektromobil narxi 30 ming dollardan boshlangan avvalgi modeldan qimmatroq bo‘lishi kutilmoqda.
Izoh (0)