O‘zbekiston Davlat aktivlarini boshqarish agentligi xususiylashtirish dasturi doirasida avtomobil sanoatiga oid uchta yirik korxonadagi davlat ulushlarini ochiq savdoga chiqarayotganini e’lon qildi.
Uzsungwoo MChJ ustav kapitalidagi 50 foiz, Avto Climate Control MChJ ustav kapitalidagi 100 foiz hamda Uz truck and Bus Motors MCHJ ustav kapitalidagi 34,2 foiz davlat ulushlari taklif qilinmoqda.
Uzsungwoo
2011-yilda tashkil etilgan bo‘lib, avtomobil sanoati uchun shtamplash va payvandlash texnologiyalari asosida metall qismlar ishlab chiqaruvchi yetakchi korxonalardan biri hisoblanadi. Zavod yillik 120 ming to‘plam ishlab chiqarish quvvatiga ega bo‘lib, Chevrolet Cobalt, Gentra, Tracker va Onix modellari uchun ehtiyot qismlar yetkazib beradi. Korxona ustav fondi 14 million dollarni tashkil etadi.
Avto Climate Control
2010-yilda “O‘zavtosanoat” AJ va Janubiy Koreyaning Erae Cs Limited kompaniyalari bilan hamkorlikda tashkil etilgan bo‘lib, asosiy faoliyati avtomobillar uchun isitish va sovitish tizimlarini ishlab chiqarishdan iborat. Ustav fondi 12,6 milliard so‘mni tashkil etadi.
Uz truck and Bus Motors
2009-yilda tashkil etilgan bo‘lib, Markaziy Osiyo mintaqasida MAN va Howo yuk mashinalari va yo‘lovchi texnikasini ishlab chiqaruvchi yirik korxona hisoblanadi. Zavod 60 dan ortiq turdagi transport vositalarini ishlab chiqarish imkoniyatiga ega bo‘lib, ushbu toifadagi texnika orasida tyagachlar, avtosamosvallar, furgonlar, maxsus texnikalar, yuk ko‘tarish quvvati 5 tonnadan 70 tonnagacha bo‘lgan yuk mashinalari hamda shahar va shaharlararo avtobuslar mavjud. Uning ustav fondi 32,8 million yevroga teng.
Savdo jarayoni har bir aktiv bo‘yicha alohida-alohida ikki bosqichda amalga oshiriladi. Birinchi bosqichda investorlar o‘z qiziqishlarini bildirgan holda tegishli hujjatlarni taqdim etishlari lozim. Ikkinchi bosqichda esa majburiyatga ega bo‘lgan takliflar qabul qilinadi va eng yuqori narx taklif qilgan talabgor bilan bitim imzolanadi. Investorlarning moliyaviy resurslarining yetarliligi, sanksiyalar ro‘yxatida yo‘qligi hamda shaffof kelib chiqish mezonlariga mos kelishi muhim talablardan biri hisoblanadi.
Talabgorlar qiziqish bildirish to‘g‘risidagi arizalarini 2025-yil 15-aprel soat 23:59 gacha taqdim etishlari zarur.
Izoh (0)