2024-yilda bir qator yangi va yangilangan avtomobil modellari ishlab chiqildi. Quyida Car and driver jurnaliga ko‘ra eng yaxshi deb topilgan mashina modellari ro‘yxatini keltiramiz.
Cadillac CT4-V Blackwing
Cadillac kompaniyasining mazkur sport sedani 2024-yilda 3,6 litrli V6 biturbo dvigatel bilan taqdim etilgan bo‘lib, 472 ot kuchiga ega. Avtomobilning dizayni sport va zamonaviy uslubda. Uning tezligi 4,1 soniyada 0 dan 100 km/soatgacha yetadi va maksimal tezligi 304 km/soatni tashkil etadi. Mashina 66 litrli yoqilg‘i bakiga ega. Avtomatik uzatmalar qutisili Cadillac bagajining hajmi 303 litrga teng.
CT4-V Blackwing’ning narxi 60 ming dollardan boshlanadi.
Cadillac CT5-V Blackwing
Eng yaxshi avtomobillar reytingida Cadillac rusumi yetakchilik qilmoqda. Ushbu model eng ilg‘or texnologiyalar asosida ishlab chiqilgan bo‘lib, yuqori tezlik, qulay boshqaruv, zamonaviy texnologiyalar va jozibali dizaynni o‘zida mujassam etgan. U Android Auto va Apple CarPlay tizimlari bilan to‘liq integratsiya qilingan hamda Remote Start va Keyless Entry tizimlari yordamida masofadan boshqarish imkoniyatiga ega.
Boshlang‘ich narxi 95 ming AQSH dollaridan boshlanadi, ammo u qo‘shimcha konfiguratsiyalar asosida o‘zgarishi mumkin.
Chevrolet Corvette
AQSH avtomobil sanoatining eng mashhur sport avtomobillaridan biri Chevrolet Corvette ilk bor 1953-yilda chiqarilgan. Corvette o‘zining yuqori tezligi, o‘ziga xos dizayni, innovatsion texnologiyalari bilan ko‘plab sport avtomobili ixlosmandlariga yoqadi.
Corvette har yili turli versiyadagi mashinalarn ishlab chiqaradi. Bugungi kunda mavjud bo‘lgan eng yangi model Chevrolet Corvette C8 bo‘lib, uning motori orqa tomonda (mid-engine) joylashgan. Bunday o‘zgarish avtomobil boshqaruvini qulay va tezligini sezilarli darajada yaxshi bo‘lishiga hissa qo‘shadi.
Honda Accord
Honda Accord uzoq yillar davomida ishonchli avtomobil sifatida tanilgan. Uning mustahkam dvigateli va mexanikasi, uzoq masofali yo‘llar uchun mo‘ljallangan interyeri sababli doim avtoreytinglarda yuqori o‘rinni egallaydi.
Honda Accord xavfsizlikka katta e’tibor beradi: u Sensing tizimi, adaptiv kruiz-kontrol, haydash uchun avtomatik yordam tizimi va favqulodda tormoz tizimi kabi ilg‘or xavfsizlik texnologiyalarini o‘z ichiga oladi. Bu model o‘rta va lyuks sinfdagi avtomobil ishqibozlari uchun yaxshi tanlovdir.
Honda Civic
Kichik va kompakt modeldagi Honda Civic 2 litrli 4-silindrli dvigatel (LX va Sport versiyalarida) va 158 ot kuchiga ega. Uzatmalar qutisi yuqori samaradorlik va yoqilg‘i tejash tizimi bilan ta’minlangan. Uning boshlang‘ich narxi taxminan 23 ming AQSH dollaridan boshlanadi va professional versiyalari uchun 28 ming dollardan oshishi mumkin.
Lucid Air
Lucid Air bir nechta versiyada taqdim etiladi, har biri turli imkoniyatlar va mexanik xususiyatlarga ega.
Model Dual-motor all-wheel drive tizimi (2 motorli tizim) ga ega bo‘lib, har bir g‘ildirakni mustaqil boshqarish imkoniyatiga ega. Batareya hajmi modelga qarab 113 kV/s yoki 118 kV/s. Dvigateli 480 ot kuchiga ega. Birgina quvvat bilan avtomobil 832 kilometr yura oladi. Bu xususiyat uni bugungi kundagi eng uzoq masofa bosuvchi elektr avtomobillaridan biriga aylantiradi. Mashinaning maksimal tezligi 270 km/soatga yetadi.
Lucid Air’ning narxi modelga va konfiguratsiyaga qarab farq qiladi va 87 ming AQSH dollaridan boshlanadi.
Mercedes-Benz E450
Ushbu model Mercedes-Benz kompaniyasining E-Class seriyasiga mansub, yuqori darajadagi sport sedani bo‘lib, o‘zining kuchli dvigateli, klassik interyeri va nozik didli dizayni bilan ajralib turadi. Mercedes-Benz E450 versiyasi esa o‘rta sinfdagi modeldir.
3 litrli turbocharged I6 dvigatel hamda mild-hybrid tizimi bilan jihozlangan hamda 362 ot kuchiga ega. Bunday turdagi dvigatel maksimal tezlik va tezlanishni ta’minlaydi va yoqilg‘i tejash imkoniyatini beradi. Mashina 9G-TRONIC avtomatik uzatmalar qutisiga ega. Unga o‘rnatilgan 4MATIC maxsus sistemasi avtomobilning harorat va yo‘l sharoitlariga qarab har bir g‘ildirakni alohida boshqaradi, bu esa mashinani yanada barqaror va xavfsiz haydash uchun zamin yaratadi.
Mercedes-Benz E450 ning narxi konfiguratsiyaga qarab taxminan 65 ming AQSH dollari va undan yuqoridir.
Porsche Boxster / Cayman
Porsche kompaniyasining ushbu ikkita sport avtomobilining har biri o‘zining ajoyib dizayni, mustahkam va uzoq muddatli dvigateli bilan ajralib turadi. Boxster va Cayman Porsche 718 seriyasining davomi sanaladi. Boxster — bu kabriolet (ochiq) model, Cayman esa yopiq versiyasi. Ularning narxi 60 ming dollardan 100 ming dollargacha yetadi.
Subaru BRZ / Toyota GR86
Sport avtomobillarini yaxshi ko‘radigan, ammo hamyonbop narxni izlaydigan mashina ixlosmandlari uchun mazkur modellar eng maqbul tanlovdir. Har ikkala avtomobil bir xil texnik xususiyatlarga ega. Shuningdek, ular rear-wheel drive (RWD) tizimi va ajoyib boshqaruv tizimini o‘zida birlashtiradi.
Tesla Model 3
Tesla Model 3 eng mashhur va ommabop elektr avtomobillaridan biri bo‘lib, o‘zining energiya samaradorligi, tezligi va innovatsion texnologiyalari bilan tanilgan. Uning tashqi ko‘rinishi oddiy va minimalistik uslubda va Tesla’ning boshqa modellari kabi aerodinamik va zamonaviy dizaynga ega. Avtomobilning ichki qismi ham minimalistika uslubida, barcha vazifa o‘rtada joylashgan katta ekran orqali boshqariladi.
Tesla Model 3 ning o‘ziga xos imkoniyati bu avtopilot tizimidir. U haydovchiga mashinani boshqarish, to‘xtatish, parkovka qilish kabi funksiyalarni avtomatik tarzda amalga oshirish imkonini beradi.
Tesla Model 3 narxi 38 ming AQSH dollaridan boshlanadi.
Izoh (0)