Toshkentdagi bojxona postidan olib o‘tilmoqchi bo‘lgan avto ehtiyot qismlari samosval bo‘lib chiqdi (video)

Toshkent shahridagi “Sergeli” bojxona posti orqali avto ehtiyot qismlari sifatida olib o‘tilmoqchi bo‘lgan yuk, aslida, butun samosval bo‘lib chiqdi.

Bojxona qo‘mitasi matbuot xizmatining ma’lum qilishicha, xorijdan keltirilgan 11 turdagi avto ehtiyot qismlari, aslida, bir butun holdagi tovar — o‘zi ag‘daruvchi (samosval) tayyor yuk avtotransport vositasi ekanligi fosh bo‘ldi.

Transport vositasini qismlarga ajratib go‘yoki avto ehtiyot qism niqobi ostida olib kirishga urinish orqali yuk egasi 800 million so‘mlik bojxona to‘lovlarini “tejamoqchi” bo‘lgan, deyiladi qo‘mita xabarida.

Qo‘mita transport vositasini yig‘ish jarayoni aks etgan videoni e’lon qildi.

2025-yil boshida O‘zbekistonda bojxona yig‘imlarining yangi stavkalari tasdiqlandi. Ushbu yig‘im stavkalari 4-maydan boshlab kuchga kiradi. Unga ko‘ra, xorijiy internet-do‘konlardan mahsulot xarid qilganda bojxona yig‘imi to‘lashi kerak bo‘ladi. Xalqaro kuryerlik jo‘natmalari, ya’ni, Wildberries, Ozon, AliExpress, Globbing, Amazon va boshqalardan buyurtmalar qilinganda 1 kg uchun BHMning 2 foizi — 7500 so‘m miqdorida yig‘im to‘lanadi. Ilgari bir oyda 1000 dollardan kam bo‘lgan buyurtmalar uchun bojxona to‘lovlari undirilmagan.