Amerika avtomobillari auksion uyi Rockstar AQSH prezidenti Donald Trampning mashinasini kimoshdi savdosiga qo‘ydi. Bu haqda auksion uyi saytida xabar berildi.
Lotga 2007-yilda ishlab chiqarilgan Ferrari F430 Coupe rusumli superkari kiritilgan. Avtomobil aynan Trampga tegishli ekaniga dalil sifatida hujjatlar va DJT (Donald Jon Tramp) harflari bilan davlat ro‘yxatidan o‘tkazish belgisi ham saytga joylashtirilgan.
Prezident bu mashinaga qancha vaqt egalik qilgani aytilmagan. Ferrari’ning holati yaxshi deb baholangan: mashina hech qachon urilmagan va bo‘yoq shaffof plyonka bilan himoyalangan. Rockstar auksion uyi avtomobil holatini 10 balldan 9 ballga baholagan.
Ferrari F430 Coupe sportkari qizil rangda. Interyeri esa qaymoq rangli yuqori sifatli charmdan ishlangan. Mashina mexanik uzatmalar qutisi bilan harakatlanadi.
Avtomobilning texnik xususiyatlari:
Ferrari F430 Coupe 490 ot kuchiga ega, 4,3 litrli V8 dvigateli bilan jihozlangan. U 100 km/soat tezlikka 3,9 soniyada chiqadi. Sportkarning maksimal tezligi 315 km/soatni tashkil qiladi. Hujjatlarga ko‘ra, Trampning mashinasi 15,1 ming km masofa bosib o‘tgan.
Rockstar auksionida F430 Coupe 1 million dollarga baholandi, deb yozadi Auto Bild. Germaniyada xuddi shunday xarakteristikaga ega avtomobil odatda 150 mingdan 180 ming AQSH dollarigacha narxda sotiladi.
Ehtimol, kimoshdi savdolar uyi avvalroq Trampning 1,1 million dollarga sotilgan Lamborghini Diablo VT ga asoslanib Ferrari’ga shunday narx belgilagandir.
Izoh (0)