Toshkent viloyati Angren shahriga 15 ta Yutong avtobuslari olib kelindi. Bu haqda Transport vazirligi axborot xizmati xabar berdi.
Qayd etilishicha, Angren shahri jamoat transporti tizimini rivojlantirish, yo‘lovchilarga ko‘rsatilayotgan transport xizmatlarini sifat jihatidan yangi bosqichga olib chiqish maqsadida "ANGREN AVTO GROUP" MCHJ tomonidan 15 dona zamonaviy Yutong avtobuslari olib kelindi.
Joriy yilda Toshkent viloyatining 7 ta shahrida brutto-shartnoma tizimi asosida 21 ta yo‘nalishida tashuvlarni tashkil etish maqsadida 170 ta yangi avtobuslarni xarid qilish rejalashtirilgan.
2025-yilda jamoat transporti yetib bormagan hududlarni qamrab olgan holda 12 ta yangi yo‘nalish tashkil etiladi. Shuningdek, avtotransportlarni dispetcherlik markaziga integratsiya qilish hamda shahar avtobus yo‘nalishlarida avtomatlashtirilgan to‘lov tizimini to‘liq yo‘lga qo‘yiladi.
Zoir Mirzayev 2024-yil oktyabrida o‘tkazgan hokimlik soatida Toshkent viloyatida transport sohasidagi xizmatlarni yaxshilash uchun 1000 ta yangi avtobus xarid qilish bo‘yicha topshiriq bergandi.
Transport vazirligi matbuot xizmatining bildirishicha, hududlarda aholiga ko‘rsatilayotgan transport xizmatlari sifatini yaxshilash maqsadida zamonaviy avtobuslarni olib kelish ishlari davom etmoqda. Toshkent shahriga yana 1000 ta Yutong avtobuslarini olib kelish imkoniyatlari o‘rganilmoqda. Andijon viloyatiga Xitoydan 100 ta elektrobus xarid qilinishi rejalashtirilgan.
Izoh (0)