Belgiya Qurolli Kuchlari 2025-yil oxirigacha qurol-yarog‘ xarid qilish uchun 7,3 milliard yevro sarflashni rejalashtirmoqda. Bu haqda Belgiyaning L’Echo gazetasi Mudofaa vazirligi hujjatiga asoslanib yozmoqda.
Ko‘rsatilgan mablag‘dan zirhli texnika xaridiga 4 milliard yevro, o‘q-dorilarga 2,3 milliard yevro, 11 ta F-35 qiruvchi samolyotiga esa taxminan 1 milliard yevro yo‘naltiriladi.
Mamlakat harbiy-dengiz kuchlari esa, o‘z navbatida, allaqachon buyurtma qilingan ikkita fregatga qo‘shimcha ravishda 1,3 milliard yevrolik uchinchi fregatni sotib olmoqchi.
Ta’kidlanishicha, Belgiya hukumatining sa’y-harakatlari NATO tomonidan a’zo davlatlar uchun belgilangan harbiy xarajatlarning yalpi ichki mahsulotga nisbatan 2 foizlik maqsadli ko‘rsatkichiga erishishga qaratilgan. Shu munosabat bilan mamlakatning harbiy budjeti joriy yilda 4 milliard yevroga oshib, 12 milliard yevroga yetadi.
Bundan tashqari, mamlakat hukumati 2029-yilgacha harbiy ma’lumotlarni qayta ishlash markazlari qurilishiga 965 million yevro ajratishni rejalashtirmoqda. Ushbu obyektlar sun’iy yo‘ldoshlar, uchuvchisiz uchish apparatlari va jangovar bo‘linmalarning ma’lumotlarini real vaqt rejimida qayta ishlash orqali harbiy operatsiyalarda hal qiluvchi ahamiyat kasb etadi. Shuningdek, markazlar davlat xizmatlaridan olingan ma’lumotlarni saqlash va xavfsiz tarzda qayta ishlash uchun ham foydalaniladi.
Izoh (0)