Istanbul shahri meri, muxolifatdagi Respublika xalq partiyasi vakili Akrom Imomo‘g‘li qo‘lga olingani ortidan Turkiya shaharlarida namoyishlar avj oldi. Bu haqda BBC xabar berdi.
Imomo‘g‘li bo‘lajak prezidentlik saylovlarida Turkiya yetakchisi Rajab Toyyib Erdo‘g‘onning asosiy raqibi hisoblangan. Qo‘lga olinishidan oldin Istanbul universiteti merning diplomini bekor qilgan. Imomo‘g‘lining oliy ma’lumoti yo‘qligi prezidentlikka rasman nomzod bo‘lishga imkon bermaydi.
Namoyishchilar shahar hokimiyati, Imomo‘g‘li saqlanayotgan politsiya bo‘limi, Istanbul universiteti va boshqa yaqin joylarda to‘plangan. Ular hukumatga qarshi shiorlarni aytgan.
Yuz bergan voqea to‘ntarishga urinish bo‘ldi. Akrom Imomo‘g‘lining prezidentlikka nomzod bo‘lish erkinligi tortib olinmayapti, bu millatdan uni saylash erkinligi tortib olinmoqda, degan Respublika xalq partiyasi yetakchisi O‘zgur O‘zel meriya binosi oldida to‘plangan namoyishchilarga.
Dilek Imomo‘g‘li erining qo‘lga olinishini “Turkiyaning bo‘lajak prezidentini yo‘q qilishga qaratilgan maqsadli siyosiy operatsiya” deb atadi.
Bu millatga to‘g‘ridan to‘g‘ri zarba va biz, kurashamiz, deya ta’kidladi u.
To‘qnashuvlar haqida xabarlar kelib tushgan. Voqea joyidan olingan kadrlarga ko‘ra, politsiya Istanbul universiteti hududida Imomo‘g‘lining oliy ma’lumot to‘g‘risidagi diplomini bekor qilish qaroriga norozilik bildirgan talabalarni tarqatish uchun maxsus vositalardan foydalangan.
Respublika xalq partiyasining bo‘lajak qurultoyida 2028-yilda bo‘lib o‘tishi kerak bo‘lgan prezidentlik saylovlarida muxolifat nomzodi sifatida Akrom Imomo‘g‘li e’lon qilinishi kutilgan edi. Muddatidan oldin saylovlar 2027-yil noyabrida bo‘lib o‘tishi mumkin.
Imamo‘g‘li ikkita tergov doirasida shubha ostiga olingan — uni korrupsiyada va terrorchilik tashkilotlari bilan aloqadorlikda gumon qilishmoqda. Tergov jarayonida 100 ga yaqin kishi, jumladan, merning maslahatchisi ham ushlangan.
Imamo‘g‘li hibsga olingandan so‘ng, uning ijtimoiy tarmoqlarida “xalq irodasini qo‘rqitish yoki noqonuniy harakatlar orqali bostirib bo‘lmaydi” degan bayonot paydo bo‘lgan.
Men nafaqat Istanbulning 16 million aholisiga, balki Turkiyaning 86 million fuqarosiga, shuningdek, butun dunyoda demokratiya va adolatni qo‘llab-quvvatlayotgan barcha insonlarga ishonch bildirgan holda qat’iy turibman, deya ta’kidlangan bayonotda.
Turkiya adliya vaziri Yilmaz Tunch merni siyosiy ta’qib qilish ayblovlarini rad etdi va Erdo‘g‘onni muxolifatga qarshi repressiyalar va hibsga olishlar bilan bog‘layotganlarni tanqid qildi.
Turkiyada hech kim qonundan ustun emas, deya qo‘shimcha qildi u.
Hukmron Adolat va taraqqiyot partiyasi ham Erdo‘g‘onga qo‘yilgan ayblovlarni rad etib, Turkiya sud tizimi mustaqilligini e’lon qildi.
Izoh (0)