Bir necha haftadan beri turk ommaviy axborot vositalari “Muhtasham yuz yil” seriali yulduzi Halit Ergenchning shov-shuvli mojaroga aralashib qolgani haqida xabar bermoqda.
Aktyor turli san’atkorlarning shaxsiy menejeri hisoblangan Ayshe Barimning ishi bo‘yicha sudga taklif qilindi. Bu ayol Hande Erchel, Serenay Sarikaya va boshqa mashhur turk yulduzlari bilan hamkorlikda ishlagan.
Ayshe Barim hozirda 12 yil avval bo‘lib o‘tgan mamlakat to‘ntarilishiga yordam berganlikda va hukumatga qarshi namoyishlarda qatnashganlikda ayblanmoqda. Shuningdek, u Turkiya kino sanoatini yagona monopoliyaga aylantirib, atrofiga muxolif g‘oyalari mavjud bo‘lgan aktyor va aktrisalarni to‘plashga uringanlikda ham gumon qilinmoqda.
Foto: Birgün Gazetesi
Shu munosabat bilan mamlakat bosh prokuraturasi Ayshe Barim bilan ishlagan barcha taniqli shaxslarni guvohlik berishga chaqirdi. U bilan hamkorlik qilganlar orasida Halit Ergench ham bor.
Tergovning dastlabki bosqichida aktyor guvoh sifatida so‘roq qilindi. Biroq tez orada vaziyat o‘zgardi: prokuratura uni yolg‘on guvohlik berishda aybladi. Tergov natijalariga ko‘ra, hukumatga qarshi namoyishlar paytida Halit Ergench va Ayshe Barim yaqin aloqada bo‘lgan. Aktyor esa sudda javob berayotgan vaqtda uni oqlashga uringan.
Foto: DW
Foto: ERR
Avvalroq Halit Ayshening ajoyib inson ekanligiga iymoni komilligini va sud unga nisbatan nohaq ayblov qo‘yishga urinayotganini aytgan edi.
Voqealar bunday tus olishini hech kim kutmagan edi. Endilikda Sulton Sulaymon oldida jiddiy vazifa: o‘zining aybsiz ekanligini isbotlash turibdi. Aks holda aktyor jinoiy javobgarlikka tortilishi mumkin.
Ma’lumot uchun: Ayshe Barim 2013-yilda Istanbuldagi Gezi bog‘ida hukumatni ag‘darishga qaratilgan norozilik namoyishlarini uyushtirganlikda ayblanib, joriy yil 27-yanvar kuni hibsga olindi. Turk OAV qayd etishicha, Barim 12 yil avvalgi noqonuniy harakatlarda ishtirok etgani uchun umrbod qamoq jazosiga hukm qilingan Usmon Kavala bilan yaqindan tanish bo‘lgan.
Izoh (0)