O‘tgan hafta davomida Gretsiya, Ispaniya, Bolgariya, Chernogoriya va Albaniya butun Yevropa bo‘ylab bir vaqtning o‘zida avj olgan o‘rmon yong‘inlariga qarshi kurashish uchun Yevropa Ittifoqining fuqaro muhofazasi mexanizmini ishga tushirdi. Bu haqda Bryusselda o‘tkazilgan matbuot anjumanida Yevropa Komissiyasining rasmiy vakili Yeva Xrnchirova ma’lum qildi.
Uning aytishicha, Ispaniya buni birinchi marta amalga oshirgan. U Fransiyada joylashgan ikkita rescEU samolyoti yordamga safarbar qilinganini va ular bugunoq yong‘inni o‘chirishni boshlashi kutilayotganini qo‘shimcha qildi.
“Yevropa Ittifoqi mamlakatlariga, shuningdek, boshqa murojaat qilgan davlatlarga tezkor yordam ko‘rsatish uchun ittifoqning turli hududlarida yong‘inga qarshi aviatsiya joylashtirilgan”, dedi Xrnchirova.
Gretsiya ushbu mexanizmni 12-avgust kuni ishga tushirdi. Bunga javoban hozirda Bolgariyada turgan Shvetsiyaning ikkita rescEU vertolyotini joylashtirish rejalashtirilmoqda. Yong‘inni o‘chirishda Chexiya, Moldova va Ruminiya o‘t o‘chiruvchilari ham ishtirok etdi.
Bolgariyada olti mamlakat - Chexiya, Slovakiya, Fransiya, Vengriya, Ruminiya va Shvetsiya aviatsiyasi, jumladan, Shvetsiyada joylashgan rescEU vertolyotlari safarbar etilgan.
Albaniyadagi o‘rmon yong‘inlarini o‘chirishda Xorvatiya, Bolgariya, Italiya, Chexiya va Slovakiyadan, Chernogoriyada esa Chexiya, Xorvatiya va Italiyadan rescEU havo vositalari ishtirok etmoqda. Serbiya, Vengriya hamda Bosniya va Gersegovina ham ikki tomonlama kelishuvlar doirasida aviatsiya vositalarini jo‘natgan, Avstriya esa quruqlikdagi o‘t o‘chirish brigadalarini taklif etgan.
Ta’kidlanishicha, mavsumda Yevropa Ittifoqining fuqaro muhofazasi mexanizmi butun qit’ada halokatli yong‘inlarga sabab bo‘lgan issiqlik to‘lqiniga qarshi kurashish uchun allaqachon 16 marta faollashtirilgan.
Bundan avval Rekord darajadagi issiq Ispaniya va Portugaliyada yirik yong‘inlar chiqishiga sabab bo‘lgani xabar qilingandi.
Qayd etish lozim, bu yilgi jazirama va qurg‘oqchilik Yevropada keng ko‘lamli o‘rmon yong‘inlarini keltirib chiqarmoqda. Oqibatda 2025-yilda mintaqada deyarli Lyuksemburg maydoniga teng hudud yonib kul bo‘lgan.
Izoh (0)