Туркияда Истанбул шаҳар ҳокими Акрам Имомўғлининг қамоққа олиниши сабабли бошланган норозилик намойишларининг тўрт куни ичида 1,1 мингдан ортиқ намойишчи ушланди, 123 нафар полициячи жароҳат олди. Бу ҳақда республика Ички ишлар вазири Али Ерликая маълум қилди.
“Намойишлар пайтида 123 нафар полициячи жароҳат олди. Акциялар давомида кислота, тошлар, таёқлар, пиротехника воситалари, ёнувчи аралашмали шишалар, болталар ва пичоқлар мусодара қилинди. Полицияга ҳужум қилган, жамоат мулкига зарар етказган ва фуқароларимиз хавфсизлигига таҳдид солганлар устидан суд жараёнлари давом этмоқда. 2025 йил 19-23 март кунлари мобайнида ноқонуний хатти-ҳаракатлар содир этганликда гумон қилинган 1133 нафар шахс ҳибсга олинди. Қўлга олинганлар орасида 12 та турли террорчилик ташкилотига алоқадор шахслар борлиги аниқланди”, деб ёзган вазир ўзининг Х ижтимоий тармоғидаги саҳифасида.
Ерликая ҳибсга олишлар муносабати билан “сўнгги кунларда айрим гуруҳлар йиғилишлар ва намойишлар ўтказиш ҳуқуқини суиистеъмол қилиб, жамоат тартибини бузишга уринаётгани, кўча тадбирларини қўзғатиб, полицияга ҳужум қилаётганини” таъкидлаган.
“Ҳибсга олинган шахслар илгари 17 хил жиноят, жумладан, гиёҳванд моддалар билан боғлиқ жиноятлар, ўғрилик, фирибгарлик, жинсий тажовуз, тан жароҳати етказиш каби жиноятлар учун жавобгарликка тортилган”, дейди у.
Эслатиб ўтамиз, учун Истанбул шаҳри мэри, мухолифатдаги Республика халқ партияси вакили Акрам Имомўғли қўлга олингани ортидан 19 мартдан буён Туркия шаҳарларида турли намойишлар ўтказилмоқда.
Изоҳ (0)