Истанбул полицияси ўтган якшанба куни ҳибсга олинган шаҳар мери Акром Имомўғлини қўллаб-қувватлаш акциясини ёритгани учун камида саккиз нафар турк журналистини ҳибсга олди. Бу ҳақда Туркия ОАВ ходимлари касаба уюшмаси маълум қилди.
Диск-Басин-Ис касаба уюшмаси хабар қилишича, камида саккиз нафар мухбир ва фотосуратчини қамоққа олишган. Бу ҳукуматнинг норозилик кайфияти кучайишига қарши чораларини кучайтирганидан дарак беради. Касаба уюшмаси ҳокимият ҳаракатларини “матбуот эркинлиги ва халқнинг ҳақиқатни билиш ҳуқуқига тажовуз” деб баҳолаган.
Касаба уюшмаси баёнотида қайд этилишича, ОАВ вакиллари томонидан касбий фаолиятни амалга ошириш жиноят ҳисобланмайди. Шу сабабли ташкилот ушланганларни дарҳол озод этишга чақирган.
“Камида саккиз нафар мухбир ва фотомухбир ўз уйида ҳибсга олинган. Ташкилотнинг ишончи комил: бу ҳокимиятнинг мустақил овозларни бўғиш ва норозилик намойишларини ёритишни чеклашга уринишидир. Журналистларни жим қилиш билан ҳақиқатни яшира олмайсиз!”, дея ёзган ташкилот ўзининг Х ижтимоий тармоғидаги саҳифасида.
Х ижтимоий медиа платформаси Туркия ҳокимиятининг 700 дан ортиқ ҳисобни, шу жумладан янгилик ташкилотлари, журналистлар ва Туркия сиёсий арбобларининг ҳисобларини тўсишга оид кўплаб суд қарорларига қарши эканлигини билдирди.
Аввалроқ, Туркия Ички ишлар вазирлиги раҳбари Али Ерликая ўз навбатида, тўрт кунлик норозилик намойишлари давомида мамлакатда 1,1 мингдан ортиқ киши ҳибсга олинганини, уларда 123 нафар полициячи жароҳатланганини маълум қилганди.
Изоҳ (0)