Andijon viloyatida 2024-yilda korrupsiya ortidan 820 nafar shaxs jinoiy javobgarlikka tortilgani ma’lum bo‘ldi.
Xabar berilishicha, 20-mart kuni Andijon viloyatida Oliy Majlis Senatining Sud-huquq masalalari va korrupsiyaga qarshi kurashish qo‘mitasi, Korrupsiyaga qarshi kurashish agentligi, xalq deputatlari Andijon viloyati Kengashi hamda Andijon viloyati Korrupsiyaga qarshi kurashish hududiy kengashining kengaytirilgan qo‘shma majlisi bo‘lib o‘tdi.
Unda mas’ul davlat idoralari, huquqni muhofaza qiluvchi organlar vakillari, xalq deputatlari mahalliy kengashlar deputatlari va ommaviy axborot vositalari xodimlari ishtirok etdi. Majlisda prezident ishtirokida 2025-yil 5-mart kuni o‘tkazilgan Korrupsiyaga qarshi kurashish milliy kengashining yig‘ilishida belgilangan ustuvor vazifalar muhokama qilindi.
Muhokamalar chog‘ida Korrupsiyaga qarshi kurashish milliy kengashi va uning hududiy bo‘linmalari faoliyatidagi kamchiliklar tanqidiy baholanib, ularning tarkibi to‘liq yangilanishi hamda viloyat Kengashi raislari boshchiligida faoliyat yuritishi belgilandi.
Shuningdek, Andijon viloyatida korrupsiyaga qarshi kurashish bo‘yicha amalga oshirilgan ishlar tahlil qilindi. Ta’kidlanishicha, viloyatda 2024-yilda 502 ta korrupsiyaviy va mansabdorlik jinoyati sodir etilgan bo‘lib, 820 nafar shaxs jinoiy javobgarlikka tortilgan. Natijada davlat manfaatlariga 125,7 mlrd so‘m miqdorida zarar yetkazilgan.
Korrupsiyaviy jinoyatlar bo‘yicha javobgarlikka tortilgan shaxslarning asosiy qismi mol-mulkni talon-toroj qilish (514 nafar), pora berish (64 nafar), firibgarlik (35 nafar), pora olish (26 nafar) va mansab vakolatlarini suiiste’mol qilish (22 nafar) kabi jinoyatlarni sodir etgan.
Majlis davomida hududiy idoralarga korrupsiyaga qarshi kurashish ishlarini yanada kuchaytirish, bu boradagi reytingga ta’sir etuvchi salbiy omillarni bartaraf etish, davlat dasturlarining to‘liq va o‘z vaqtida ijro etilishini ta’minlash hamda aholining huquqiy ongini oshirish bo‘yicha aniq topshiriqlar berildi.
Tadbir yakunida korrupsiyaga qarshi kurashish va jinoyatchilikning oldini olish bo‘yicha zarur chora-tadbirlarni belgilovchi qaror qabul qilindi.
O‘zbekistonda korrupsiya jinoyatligiga qaramay respublika dunyoning eng korrupsiyalashgan davlatlaridan biriligicha qolmoqda. Bu haqda Transparency International tashkiloti eʼlon qilib kelayotgan indekslarda qayd etilgan. Masalan, tashkilotning 2024-yilda 180 ta davlatni qamragan korrupsiya reytingida O‘zbekiston 121-o‘rinni egallagan. Umumiy 100 ballik baholashdan bor–yo‘g‘i 32 ball to‘plagan. Jami 50 balldan past natija davlatda korrupsiya yuqori darajada ekanini anglatadi. Shu bois, muammoga qarshi kurashish bugun yanada dolzarb ahamiyatga ega. Prezident Shavkat Mirziyoyev raisligida o‘tkazilgan yig‘ilishda bu masala keng tahlil qilindi.
Qayd etilishicha, hozir O‘zbekistonda korrupsiyaviy jinoyatlarning 75 foizi tuman va mahallada maishiy korrupsiya shaklida sodir etilmoqda. Jumladan, infratuzilmaga ulanish, litsenziya olish, imtiyozli kredit ajratish, ishga qabul qilish, malaka oshirish kabi yo‘nalishlarda korrupsiya omillari ko‘p.
Izoh (0)