Bugun Prezident odatiy formatlardan voz kechib, ilk marotaba xalq vakillari bo‘lgan senator va deputatlar bilan korrupsiyani oldini va unga qarshi kurashish masalasi bo‘yicha uchrashuv o‘tkazdi.
Xalqaro tashkilotlarning ma’lumotlariga ko‘ra, korrupsiyaning global jamiyat uchun ziyoni yiliga 3 trillion AQSH dollarini tashkil qiladi. Tahlillarga ko‘ra, har yili dunyo bo‘ylab taxminan 1 trillion AQSH dollari miqdorida pora beriladi. Korrupsiyaning YIMdagi ulushi 5 foizdan ziyodni tashkil qiladi.
Yuqorida qayd etilgan raqamlar korrupsiyaning barqaror rivojlanish uchun tahdid soluvchi eng katta global xavf ekanligini namoyon qilmoqda.
Korrupsiyaga qarshi kurashish bo‘yicha milliy kengashning navbatdagi yig‘ilishida shaxsan davlat rahbarining ishtirok etishi bu masalada qat’iy siyosiy pozitsiya va irodaning mavjudligini ko‘rsatadi.
Uchrashuvda jamiyatda eng ko‘p va qizg‘in muhokama qilinadigan masalalardan biri bo‘lgan korrupsiyani oldini olish va unga qarshi kurashish borasida amalga oshirilgan ishlar, kompleks chora-tadbirlarga baho berilib, mavjud vaziyat tahlili ochiqlandi va korrupsiyadan holi muhit yaratish bo‘yicha kelgusidagi strategik vazifalar, ularni amalga oshirish mexanizmlari kun tartibiga ko‘ndalang qo‘yildi.
Yig‘ilishda ta’kidlanganidek, bundan buyon, sektorlar faoliyati bilan prokuror, ichki ishlar va soliq shug‘ullanmasligining e’lon qilinishi o‘z vaqtida qabul qilingan qaror bo‘ldi, desak aslo mubolag‘a qilmagan bo‘lamiz.
O‘z o‘rnida e’tirof etish lozim, bundan sakkiz yil avval hududlarni sektorlarga bo‘lib ishni tashkil etish tizimining joriy etilganligi xalq bilan aniq, manzilli muloqotning yo‘lga qo‘yilishini ta’minladi. Shu bilan birga yillar mobaynida “tromb” singari to‘planib qolgan ijtimoiy muamolarni yurgizib yuborishi uchun xizmat qildi.
O‘tkan davr mobaynida prokuror, ichki ishlar va soliqchi tadbirkor va aholiga haqiqiy yelkadosh ekanligini isbotlab, xalqqa yaqinlashdi. Kechagidek esimizda, tadbirkor yoki aholi ushbu soha vakillarini ko‘rsa qandaydir ichki qo‘rquv, seskanish bo‘lardi.
Prokuror, ichki ishlar xodimi, soliqchi xonadonma xonadon, mahallama mahalla, birma bir yurib, xalqning ichiga kirib aholimiz, tadbirkorlarni qiynab turgan hayotiy muammo va ehtiyojlarini o‘rgandi va unga qonuniy yechim topishda haqiqiy maslakdosh, ko‘makchi bo‘ldi.
Agar o‘z vaqtida shunday mexanizm tashkil qilinmaganda edi, hozir o‘z mevasini berayotgan islohotlarning natijasini ko‘rmagan bo‘lar edik.
Tan olib aytish kerak, hali ham bajarilishi kerak bo‘lgan vazifalar mavjud. Davlat rahbari o‘z nutqda buning yechimini ham aniq ko‘rsatib berib, ularning o‘rniga endilikda Bosh vazir o‘rinbosarlari o‘ziga tegishli sohalar bilan o‘z kuchi va tizimi bilan shug‘ullanishi belgilandi.
Davlat rahbari prokuratura, ichki ishlar, soliq organlari rahbarlarining sektor ishidan ozod qilinishi, bu – eski davrga qaytib, aholi va tadbirkorlarga har qadamda to‘siq, korrupsiyaga sharoit yaratish, degani emas, deya qat’iy talab qo‘ydi.
Prezident Shavkat Mirziyoyev korrupsiyaga qarshi kurashishda tashabbuskor va reformator ekanligini yana bir bor namoyon qildi.
Yig‘ilish hali ham ongida eskicha dunyoqarash qoldiqlari saqlanib qolganlar uchun haqiqiy ogohlantirish “signali” bo‘ldi.
Ushbu uchrashuvdan xulosa qilib aytish mumkinki, davlatimiz rahbari tomonidan qo‘yilgan vazifalar korrupsiyaga qarshi kurashish bo‘yicha amalga oshirilayotgan islohotlarga yangi “impuls” berib bu boradagi ishlar samardorligini jadallashtirish uchun xizmat qiladi.
Anvarjon Mirkomilov,
“Taraqqiyot strategiyasi” markazi bo‘lim boshlig‘i
Izoh (0)