“Qo‘zg‘atilgan jinoyat ishlarini sanaydigan quruq statist bo‘lib qolgan” — prezident Antikorrupsiya agentligi faoliyatini tanqid qildi

Bugun, 5-mart kuni Senatda Korrupsiyaga qarshi kurashish bo‘yicha milliy kengash yig‘ilishi bo‘lib o‘tmoqda. Unda prezident Shavkat Mirziyoyev nutq so‘zlab, tizimdagi ayrim muammolarni sanadi. Bu haqda prezident matbuot kotibi Sherzod Asadov xabar berdi.

Yig‘ilishda davlat rahbari Korrupsiyaga qarshi kurashish agentligi faoliyatidan mutlaqo noroziligini aytgan.

Agentlik xodimlari vazirliklarga, hududlarga borib, aniq bir sohani tahlil qilib, muammolarga yechim berish o‘rniga, qo‘zg‘atilgan jinoyat ishlarini sanaydigan quruq statist bo‘lib qolgani taʼkidlangan.

Agentlik rahbariyati korrupsiya holati eng ko‘p bo‘lgan tuman sog‘liqni saqlash, bandlik bo‘limi yoki bank filialiga borib, holatni o‘rganmagani, yangi zamonaviy tizim bo‘yicha taklif bermagani ko‘rsatib o‘tilgan. Ushbu sohalarning bevosita rahbarlarining o‘z tizimini “korrupsiyadan xoli” qilish ishlari sustligi tanqid qilingan.

Prezident topshirig‘i bilan investitsiya dasturlari ustidan nazorat kuchaytirilganidan keyin o‘tgan yilning o‘zida 3 trillion so‘m iqtisod bo‘ldi. Yoki sog‘liqni saqlash tizimida “Situatsion markaz” ishga tushirilgani hisobiga 2024-yilda 1,2 trillion so‘mlik maqsadsiz xarajatlarning oldi olindi. Lekin, nega bu ishlar prezident topshiriq berganidan keyin boshlanishi kerak?, degan Shavkat Mirziyoyev.

Parlamentdagi byudjet qo‘mitalarida ham har yili byudjetdan eng ko‘p mablag‘ oladigan uchta vazirlikka borib, korrupsiyaviy omillarni aniqlashda va o‘zgarish qilishda tashabbuskorlik yetishmayotgani qayd etilgan.

Shu bilan birga, yig‘ilishda huquq-tartibot idoralari asosan korrupsiyani aniqlash va jazolash bilan ishlayotgani, korrupsiyaviy omillarni tag-tomiri bilan yo‘qotadigan preventiv choralarni eʼtiborsiz qoldirayotgani aytilgan.

Maʼlum qilinishicha, hozirda korrupsiyaning oldini olish, omillari bilan ishlash uchun 117 ta vazirlik va idoradagi “korrupsiyaga qarshi ichki nazorat” tuzilmalarida 1 ming 285 xodim ishlamoqda. Lekin korrupsiyaviy omillarni bartaraf etishda ularning o‘rni ham, masʼuliyati ham sezilmayotgani taʼkidlangan.