Андижон вилоятида 2024 йилда коррупция ортидан 820 нафар шахс жиноий жавобгарликка тортилгани маълум бўлди.
Хабар берилишича, 20 март куни Андижон вилоятида Олий Мажлис Сенатининг Суд-ҳуқуқ масалалари ва коррупцияга қарши курашиш қўмитаси, Коррупцияга қарши курашиш агентлиги, халқ депутатлари Андижон вилояти Кенгаши ҳамда Андижон вилояти Коррупцияга қарши курашиш ҳудудий кенгашининг кенгайтирилган қўшма мажлиси бўлиб ўтди.
Унда масъул давлат идоралари, ҳуқуқни муҳофаза қилувчи органлар вакиллари, халқ депутатлари маҳаллий кенгашлар депутатлари ва оммавий ахборот воситалари ходимлари иштирок этди. Мажлисда президент иштирокида 2025 йил 5 март куни ўтказилган Коррупцияга қарши курашиш миллий кенгашининг йиғилишида белгиланган устувор вазифалар муҳокама қилинди.
Муҳокамалар чоғида Коррупцияга қарши курашиш миллий кенгаши ва унинг ҳудудий бўлинмалари фаолиятидаги камчиликлар танқидий баҳоланиб, уларнинг таркиби тўлиқ янгиланиши ҳамда вилоят Кенгаши раислари бошчилигида фаолият юритиши белгиланди.
Шунингдек, Андижон вилоятида коррупцияга қарши курашиш бўйича амалга оширилган ишлар таҳлил қилинди. Таъкидланишича, вилоятда 2024 йилда 502 та коррупциявий ва мансабдорлик жинояти содир этилган бўлиб, 820 нафар шахс жиноий жавобгарликка тортилган. Натижада давлат манфаатларига 125,7 млрд сўм миқдорида зарар етказилган.
Коррупциявий жиноятлар бўйича жавобгарликка тортилган шахсларнинг асосий қисми мол-мулкни талон-торож қилиш (514 нафар), пора бериш (64 нафар), фирибгарлик (35 нафар), пора олиш (26 нафар) ва мансаб ваколатларини суиистеъмол қилиш (22 нафар) каби жиноятларни содир этган.
Мажлис давомида ҳудудий идораларга коррупцияга қарши курашиш ишларини янада кучайтириш, бу борадаги рейтингга таъсир этувчи салбий омилларни бартараф этиш, давлат дастурларининг тўлиқ ва ўз вақтида ижро этилишини таъминлаш ҳамда аҳолининг ҳуқуқий онгини ошириш бўйича аниқ топшириқлар берилди.
Тадбир якунида коррупцияга қарши курашиш ва жиноятчиликнинг олдини олиш бўйича зарур чора-тадбирларни белгиловчи қарор қабул қилинди.
Ўзбекистонда коррупция жиноятлигига қарамай республика дунёнинг энг коррупциялашган давлатларидан бирилигича қолмоқда. Бу ҳақда Transparency International ташкилоти эълон қилиб келаётган индексларда қайд этилган. Масалан, ташкилотнинг 2024 йилда 180 та давлатни қамраган коррупция рейтингида Ўзбекистон 121-ўринни эгаллаган. Умумий 100 баллик баҳолашдан бор–йўғи 32 балл тўплаган. Жами 50 баллдан паст натижа давлатда коррупция юқори даражада эканини англатади. Шу боис, муаммога қарши курашиш бугун янада долзарб аҳамиятга эга. Президент Шавкат Мирзиёев раислигида ўтказилган йиғилишда бу масала кенг таҳлил қилинди.
Қайд этилишича, ҳозир Ўзбекистонда коррупциявий жиноятларнинг 75 фоизи туман ва маҳаллада маиший коррупция шаклида содир этилмоқда. Жумладан, инфратузилмага уланиш, лицензия олиш, имтиёзли кредит ажратиш, ишга қабул қилиш, малака ошириш каби йўналишларда коррупция омиллари кўп.
Изоҳ (0)