Kriptoaktivlar aylanmasi sohasida tartibga soluvchi organ hisoblangan Istiqbolli loyihalar milliy agentligi (ILMA) xalqaro kriptobirjalar, shu jumladan, Binance kriptobirjasi faoliyatini kriptoaktivlar aylanmasi sohasidagi litsenziyalash talablari va shartlariga muvofiqligini tekshirdi. Bu haqda ILMA matbuot xizmati xabar berdi.
Tekshiruv davomida quyidagi qonun buzilish holatlari aniqlangan:
- O‘zbekiston fuqarolariga kriptoaktivlar bilan bog‘liq operatsiyalar bo‘yicha xizmatlar ko‘rsatilgani haqida tasdiqlangan faktlar mavjud;
- Binance platformasida operatsiyalar anonim kriptoaktivlar, shuningdek, jinoiy yo‘l (o‘g‘irlik, firibgarlik va boshqalar) orqali olingan kriptoaktivlar va mablag‘lar bilan amalga oshiriladi;
- kompaniya yuridik shaxs — O‘zbekiston rezidenti emas;
- O‘zbekistonda joylashgan serverlarda elektron platforma mavjud emas;
- kriptoaktivlar aylanmasi sohasidagi, shuningdek, jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurollarini tarqatishni moliyalashtirishga qarshi kurashish, shuningdek shaxsiy maʼlumotlarni saqlash va ulardan foydalanish sohasidagi qonun hujjatlarining talablariga rioya etilmagan;
- xizmat provayderlarining ustav jamg‘armasidan terrorchilik faoliyati bilan shug‘ullanishi mumkin bo‘lgan yoki iqtisodiy jinoyatlar, jinoiy daromadlarni legallashtirish, uyushgan jinoyatchilik, narkotik moddalarning noqonuniy aylanishi va korrupsiya uchun sudlanganligi o‘talmagan shaxslar, shuningdek, offshor hududlarda ro‘yxatdan o‘tgan kompaniyalar chetlatilgani to‘g‘risida maʼlumotlar yo‘q;
- bir qismi O‘zbekiston tijorat bankida alohida hisobvaraqda saqlanishi zarur bo‘lgan ustav jamg‘armasi mavjud emas.
Tekshiruv natijalariga ko‘ra, ILMA bayonnoma tuzib, uni ko‘rib chiqish va qoidabuzarliklarni bartaraf etish choralarini ko‘rish uchun Binance kriptobirjasiga yuborgan. Biroq Binance tegishli choralarni ko‘rmagan va O‘zbekiston hududida xizmat ko‘rsatuvchi provayder litsenziyasini olmagan.
Shu munosabat bilan agentlik Binance kriptobirjasi va kompaniya ro‘yxatdan o‘tgan yurisdiksiya regulyatoriga BHMning 300 baravari (102 million so‘m) miqdorida jarima solish bo‘yicha qaror qabul qilgan.
Huquqbuzar ushbu jarimani bir oy ichida ixtiyoriy ravishda to‘lashi mumkin, aks holda vakolatli organ jarimani undirish uchun sudga ariza beradi. ILMAning taʼkidlashicha, O‘zbekiston qonunchiligida litsenziyasiz faoliyat bilan shug‘ullanganlik uchun maʼmuriy va jinoiy javobgarlik choralari belgilangan.
Binance savdo hajmi bo‘yicha ilk va eng yirik kriptovalyuta birjalaridan biridir. Platforma 2017-yilda tashkil etilgan va Kayman orollarida ro‘yxatdan o‘tgan. 2023-yil noyabrda pul yuvish va bank sirini buzgani uchun Binance Amerika rasmiylariga qariyb 4,5 milliard dollar jarima to‘laydigan bo‘lgani to‘g‘risida xabar berilgandi.
Izoh (0)