Korrupsiyaga qarshi kurashish agentligiga 2023-yilda eng ko‘p ta’lim sohasi xodimlari xatti-harakatlari va sohadagi qonun buzilish holatlari bo‘yicha murojaat kelib tushgan. Bu haqda agentlik axborot xizmati rahbari Sherzod Saparov ma’lum qildi.
Uning bildirishicha, ta’lim sohasidagi korrupsiya bo‘yicha 2023-yilda 511 ta murojaat kelib tushgan.
Shuningdek, o‘tgan yil davomida 3 545 ta murojaatning 406 tasi sud qarorlaridan noroziliklar, 301 tasi davlat xaridlari va tender savdolari jarayonidagi qonun buzilishi holatlari bo‘yicha bo‘lgan.
Agentlik tomonidan davlat xaridlari, budjet mablag‘laridan samarali foydalanish yo‘nalishlarida o‘tkazilgan o‘rganishlar natijasida aniqlangan qonun buzilishlarni bartaraf etish yuzasidan vazirlik va idoralarga 225 ta taqdimnoma, javobgarlik masalasini hal qilish bo‘yicha huquqni muhofaza qiluvchi organlarga 227 ta so‘rovnoma yuborildi.
Yuborilgan so‘rovnomalar asosida huquqni muhofaza qiluvchi organlar tomonidan Jinoyat kodeksining tegishli moddalari bilan 23 ta jinoyat ishi va 96 ta ma’muriy ishlar qo‘zg‘atildi, 74 nafar shaxs intizomiy javobgarlikka tortildi.
O‘tgan yili amalga oshirilgan ma’muriy islohotlardan so‘ng 90 ta davlat organi va tashkilotlari, shu jumladan banklarda korrupsiyaga qarshi ichki nazorat tuzilmalari faoliyati yo‘lga qo‘yildi.
Izoh (0)