Davlat xizmatchilari va davlat ulushi bor tashkilotlar xodimlari qamoqxonalarga olib borilib, mahbuslarning kameralari, tergov xonalari va mahkumlarning sayr qilish joylarini ko‘zdan kechirmoqdalar. Bu haqda Qozog‘iston Respublikasi Korrupsiyaga qarshi kurashish agentligining rasmiy vakili Doniyor Big‘aydarov ma’lum qildi.
Korrupsiya oqibatlarini aks ettiruvchi “shok terapiyasi” ko‘rinishidagi bunday profilaktik tadbirda 2 510 nafar davlat xizmatchisi ishtirok etgan.
Big‘aydarovning so‘zlariga ko‘ra, jazoni ijro etish muassasalariga davlat organlari rahbarlari, tuman hokimlari va ularning o‘rinbosarlari, shuningdek, turli bosqichdagi hokimliklar apparati boshqarmalari va bo‘limlari rahbarlari olib borilgan.
“Bu usullar bilan biz davlat xizmatchilarini qo‘rqitishni maqsad qilmaganmiz. Asosiy g‘oya - har bir davlat sektori xodimi korrupsiyaga oid huquqbuzarliklarning oqibatlari haqida tasavvurga ega bo‘lishi, qonunni buzgan taqdirda uni nima kutayotganini anglatish”, deydi Antikorrupsiya agentligi vakili.
Izoh (0)