Janubiy Koreyada sud mamlakat prezidenti Yun Sok Yolni hibsdan ozod qildi, unga qarshi hibsga olish orderi esa bekor qilindi. Bu haqda Yonhap xabar berdi.
Fevral oyida prezident tarafdorlari Seul markaziy okrug sudiga ariza bilan murojaat qilgan, sud esa qamoqqa olishni qonunga xilof deb topgan. Prezidentning advokati Sok Don Xyonning tushuntirishicha, prokuraturada apellyatsiya berish imkoniyati mavjud ekan, prezident ozod qilinmaydi.
Sudning qamoqni bekor qilish to‘g‘risidagi qaroriga qaramay, ozod qilish darhol amalga oshmaydi.
Markaziy okrug prokuraturasi yetti kun ichida apellyatsiya berishi mumkin, agar ular apellyatsiyadan voz kechsa yoki belgilangan muddatda bu huquqdan foydalanmasa, prezident ozod qilinadi, dedi advokat.
Prezident devoni 7-mart kuni hibsdan ozod qilish to‘g‘risidagi sud qarorini olqishladi.
Yun Sok Yolning hibsga olinishi
15-yanvar kuni Janubiy Koreyada tergovchilar ikkinchi urinishda Yun Sok Yolni hibsga oldi. Hokimiyatdan chetlatilgan prezidentni hibsga olishga birinchi urinish 3-yanvar kuni sodir bo‘lgandi. Biroq o‘shanda Yun Sok Yolning qo‘riqchilari politsiya hibsga olishiga qarshilik qilgan. Ikkinchi urinishda esa uzoq davom etgan qarama-qarshilikdan so‘ng, tergovchilar prezidentni Korrupsiya bo‘yicha tergov byurosiga olib borishga muvaffaq bo‘ldi.
Yun Sok Yol ushlangunga qadar videomurojaat e’lon qilib, hibsga olishni “noqonuniy” deb bilishi, ammo qon to‘kilishining oldini olish uchun tergovchilar va politsiyaga bo‘ysunishga qaror qilganini aytgan.
Dekabr oyi boshida Janubiy Koreya prezidenti mamlakatda harbiy holat joriy etishga muvaffaqiyatsiz urinib ko‘rdi, shundan so‘ng parlament uni isyon ko‘tarishga uringanlikda ayblab, davlat rahbariga impichment e’lon qildi.
Yun 14-dekabrdan (parlament uning impichmenti uchun ovoz berganidan) prezidentlik lavozimidan chetlashtirilgan. Uning o‘zi dekabrning birinchi yarmidayoq qo‘zg‘olonga urinish ayblovlarini rad etib, harbiy holat joriy etilishi “siyosiy jihatdan tasdiqlangan qaror” ekanini aytgan. U davlatni falaj qilgan muxolifatdan himoya qilish uchun shunday qaror qabul qilgandi.
Prezident advokatlarining hibsga olishning qonuniyligiga e’tiroz bildirishga urinishi tufayli uning 48 soatlik qamoq muddati to‘xtatilgandi. Keyingi hibsga olish uchun yangi order chiqarilgan.
Izoh (0)