Serbiyada prezident Aleksandr Vuchich hukumatiga qarshi keng ko‘lamli norozilik namoyishlari bo‘lib o‘tmoqda. Belgrad ko‘chalariga 325 mingga yaqin kishi chiqib, korrupsiyaga qarshi kurashish va mamlakat rahbariyatini almashtirishni talab qildi. Bu haqda Bild xabar berdi.
Ommaviy norozilik namoyishlari 2024-yilning noyabr oyida Novi-Saddagi temir yo‘l stansiyasida tom qulab tushishi, oqibatda 15 kishi halok bo‘lgani sabab boshlangan edi. Namoyishchilar fojiaga korrupsiya, beparvolik, qurilishda xavfsizlik qoidalariga rioya qilmaslik va Serbiya rahbariyatidagi “tanish-bilishchilik” sabab bo‘lganini aytgan. Namoyishlar to‘lqini boshlanganidan ko‘p o‘tmay respublika qurilish vaziri Goran Vesich iste’foga chiqqan. Keyinroq u va vokzalni rekonstruksiya qilish bilan bog‘liq yana 12 kishi qo‘lga olingan, biroq bu norozilik to‘lqinini kamaytirmadi.
Namoyishchilar Vuchichni korrupsion tuzilmalarni qo‘llab-quvvatlash, OAV erkinligini cheklash va saylovlarda manipulyatsiya qilishda ayblamoqda. Politsiya ma’lumotlariga ko‘ra, Belgrad chekkasidagi shaharlardan birida avtomobil namoyishchilar olomonini bosib ketgan, uch nafar yigit jarohatlangan.
Miting ishtirokchilari orasida eng mashhur shiorlardan biri “Korrupsiya o‘ldiradi!” shiori bo‘ldi, ko‘pchilik qonli qo‘llar tasvirlangan nishonlar taqib namoyishga chiqdi. Vuchich norozilik namoyishlarini sharhlar ekan, “namoyishchilarning 99 foizi tinch yo‘l bilan bo‘lganin” aytdi. Shu bilan birga, olti nafar faollar “konstitutsiyaviy tuzumga qarshi harakat qilishga urinish”da ayblanib, hibsga olingan.
Namoyishning keng ko‘lamliligi fonida politsiyachilar prezident qarorgohi va parlament binolari oldida ham himoya to‘siqlarini o‘rnatgan, biroq namoyish vaqtida ularga hujum qilishga urinishlar haqida xabar berilmagan. Prezident Vuchich lavozimini tark etish niyatida emasligini aytdi.
Men tirik ekanman, hech qanday o‘tish davri yoki firibgar hukumatlar bo‘lmaydi. Men shantaj va bosimga rozi emasman, men Serbiya prezidentiman va bu mamlakatda ko‘cha qoidalarni belgilashiga yo‘l qo‘ymayman, degan u.
Aksiyadan so‘ng Serbiya prezidenti yana millatga murojaat qilgan. Uning so‘zlariga ko‘ra, namoyishdagi to‘qnashuvlar oqibatida 56 kishi kasalxonaga yotqizilgan, yana 22 kishi qo‘lga olingan. Vuchich Ichki ishlar vazirligi taqdim etgan namoyishchilar soni haqidagi ma’lumotlarga qo‘shilmagan. U boshqa idoralar ishtirokchilar sonini kamroq hisoblaganini aytgan.
Izoh (0)