Isroil harbiy-havo kuchlari qiruvchi samolyotlari Livan janubiga hujum qildi, deb xabar bermoqda Al Manar telekanali. Zarbalar Hizbulloh harbiy marralarini nishonga olgani taxmin qilinmoqda.
Al Manar telekanalining xabar berishicha, Isroil qiruvchi samolyotlari 20 ga yaqin havo hujumini amalga oshirgan. Hujumlar kamida sakkizta aholi punktlari yaqinida sodir etilgan.
Al Jazeera telekanali esa Isroil 30 daqiqa ichida 15 ta havo hujumi uyushtirgani va taxminan 20-25 ta raketa otganini ma’lum qildi.
2024-yil 27-noyabrda Isroil va Livan Hizbulloh harakati o‘rtasida o‘t ochishni to‘xtatish to‘g‘risidagi kelishuv kuchga kirgandi. Yanvar oyida tomonlar uni 18-fevralga qadar uzaytirishgandi.
Isroil mudofaa vaziri Israel Kats mamlakat armiyasi AQSH bilan kelishilgan holda Livan bilan chegaradagi bufer zonada “noma’lum muddat” qolishini ma’lum qilgandi.
Livan bilan chegarada “bufer zona mavjud. Biz Qo‘shma Shtatlardan ruxsat oldik, ularga xarita berdik va biz u yerda noma’lum muddatga qolamiz”, dedi Kats Isroil mahalliy hokimiyat rahbarlarining konferensiyasida.
Izoh (0)