Isroilda harbiy xizmatni o‘tashdan bosh tortgan 1,2 ming nafardan ortiq o‘ta ortodoksal yahudiylarni hibsga olish uchun orderlar berildi. Bu haqda mahalliy OAVga tayanib Anadolu xabar bermoqda.
Ma’lum qilinishicha, 2024-yilda 3 ming nafar ultra-ortodoksal yahudiy yoshlar harbiy xizmatdan bo‘yin tovlagan.
Isroil armiyasi G‘azo sektori va Livandagi harbiy harakatlar sababli qo‘shimcha kuchlarga ehtiyoj sezmoqda. Hisob-kitoblarga ko‘ra, Isroil armiyasiga yana 10 mingga yaqin askar kerak.
2024-yilning 25-iyun kuni Isroil Oliy sudi bir ovozdan ultra-ortodoksal yahudiy (haredim) yoshlari ham Isroil armiyasida xizmat qilishlari kerakligi to‘g‘risida qaror chiqargan.
Shuningdek, noyabr oyida Isroil harbiylari G‘azo va Livanda davom etayotgan urush sababli ultra-ortodoksal yahudiylarga harbiy xizmatga chaqiruv jo‘natgani haqida xabar berildi. Oliy sud yahudiy seminariyasi talabalari harbiy xizmatdan ozod qilinmaydi, degan qarorga kelgan edi. Ularga bu imtiyozni beruvchi qonun 1948-yilda qabul qilingan, o‘shanda ultra-ortodoksal yahudiylar ozchilikni tashkil etgan. Biroq diniy hamjamiyat rahbarlari yangi tashabbusga norozilik bildirgan.
Reuters agentligining Isroil Mudofaa vazirligiga tayanib yozishicha, konservativ hamjamiyatning 7000 nafar a’zosiga bosqichma-bosqich chaqiruv qog‘ozlari yuboriladi. Ular diniy turmush tarzini saqlab qolishi uchun jamoa yetakchilari bilan hamkorlik qiladi.
Isroil aholisining taxminan 12 foizini tashkil etuvchi haredimlar an’anaviy ravishda o‘z hayotlarini diniy muassasalarda Tavrotni o‘rganishga bag‘ishlaydilar va harbiy xizmatdan qochadilar. Isroil qonunchiligiga ko‘ra esa, 18 yoshga to‘lgan shaxslar majburiy tartibda armiyaga chaqiriladi.
Izoh (0)