Исроил бош вазири Биньямин Нетаньяху ўт очишни тўхтатиш бўйича музокаралар “фақат ўқ остида” ўтказилишини айтди. У Ғазода юзлаб тинч аҳолининг ўлимига сабаб бўлган ҳужумлар “фақат бошланиши” эканини қўшимча қилди. Бу ҳақда Al Jazeera хабар берди.
Нетаньяху 18 март куни кечқурун телевидение орқали чиқиш қилди. У Исроил ҳарбийлари ҲАМАСга “кучайиб бораётган куч” билан зарба беришини қайд этди.
ҲАМАС сўнгги 24 соат ичида кучларимизнинг оғирлигини ҳис қилди, мен сизни ва уларни ишонтириб айтмоқчиманки, бу фақат бошланиши. Биз урушдаги барча мақсадларимизга эришиш учун курашишда давом этамиз — барча гаровга олинганларни озод қилиш, ҲАМАСни йўқ қилиш ва Ғазо Исроилга таҳдид солмаслигига ваъда, деди Нетаньяху.
Шунингдек, у музокараларда олдинга силжиш йўқлиги учун айбни тўғридан тўғри ҲАМАСга юклади.
Исроил президент Трампнинг махсус вакили Стив Витковнинг таклифини қабул қилган бўлса-да, ҲАМАС буни қатъиян рад этди. Шу сабабли мен кеча ҲАМАСга қарши ҳарбий ҳаракатларни қайта бошлашга рухсат бердим, дея ҳужумни изоҳлади Нетаньяху.
Исроил бош вазири Ғазодаги “барча кутилмаган қурбонлар” учун ҲАМАС жавобгар эканини даъво қилди.
Фаластинлик тинч аҳоли ҲАМАС террорчилари билан ҳар қандай алоқадан қочиши керак ва мен Ғазо аҳолисини хавфдан қочишга чақираман, дея таъкидлади у.
Нетаньяхунинг баёноти Исроил икки ойлик сулҳдан сўнг 18 мартга ўтар кечаси Ғазо секторига ҳужумларни тиклагани фонида янгради. Исроил ҳужумларида 400 дан ортиқ фаластинлик тинч аҳоли ҳалок бўлди, уларнинг аксарияти болалар, яна 560 дан ортиқ киши яраланди. Фаластин соғлиқни сақлаш вазирлиги маълумотларига кўра, қурбонлар орасида 174 дан ортиқ бола бор.
♦ Ғазодаги 60 га яқин гарвовдагиларни озод қилиш ва доимий ўт очишни тўхтатиш бўйича сулҳнинг иккинчи босқичи ҳақидаги музокаралар Исроилнинг биринчи босқични апрель ойининг ўрталаригача узайтиришни талаб қилиши туфайли боши берк кўчага кириб қолди.
ҲАМАС ўт очишни тўхтатиш режими бошланганидан бери 2 мингга яқин фаластинлик маҳбус эвазига ўттиздан ортиқ гаровдагиларни озод қилди.
Исроил ҳужумидан олдин АҚШ президенти Дональд Трампнинг Яқин Шарқ бўйича махсус вакили Стив Виткофф ўт очишни тўхтатишни Рамазон ва Пасхадан кейинга ҳам чўзишн таклиф қилганди. Таклифга кўра, ҲАМАС маҳбуслар эвазига қўшимча тирик асирларни озод қилиши, томонлар эса доимий ўт очишни тўхтатиш тизими устида иш олиб бориши керак эди.
Бир неча кун олдин АҚШ президенти ўзининг ижтимоий тармоқдаги саҳифасида ҲАМАС гуруҳига “сўнгги огоҳлантириш” бериб, барча исроиллик гаровга олинганларни озод қилишни талаб қилган эди. У ҲАМАСнинг барча аъзосини йўқ қилиш учун Исроилга зарур бўлган барча нарсани юборишини қайд этганди.
Изоҳ (0)