Biz hamon o‘tmishdagi yulduzlarning iste’dodini yuqori qadrlaymiz: ular qatnashgan filmlarni qayta-qayta ko‘ramiz, qo‘shiqlarini tinglashdan charchamaymiz. Mashhur aktyor yoki qo‘shiqchilarning ko‘plab farzandlari va nabiralari ularning izidan borgani hech kimga sir emas. Bunda ajablanarli hech narsa yo‘q, chunki xarizma va joziba avloddan avlodga osonlikcha o‘tadi.
Svetlana Nemolyaeva va Polina Lazareva
Polina ijodiy muhitda ulg‘aygan, bu tabiiy hol, chunki u aktrisa Svetlana Nemolyaeva va aktyor Aleksandr Lazarevning nabirasi. Bolaligida Polina ko‘proq musiqaga qiziqardi, biroq, chamasi, genlar o‘z ta’sirini ko‘rsatib, u teatr yo‘nalishida o‘qishga kirdi. Bugun 30 yoshli qiz Mayakovskiy nomidagi teatrda rol ijro etmoqda va uning filmografiyasida 17 tadan ortiq kino mavjud.
Sofiya Rotaru va Sofiya Yevdokimenko
Mashhur xonandaning 19 yoshli nabirasi kiborlar hayotiga bolaligidanoq ko‘nikkan. U yoshligidanoq moda ko‘rgazmalarida ishtirok etgan, obro‘li jurnallarga suratga tushgan va hatto moda haftaliklaridan birida Mercedes-Benz Kiev moda kunlarining ambassadori bo‘lgan. Biroq 2 yil oldin Sofiya “Unbreakable” qo‘shig‘ini ijro etib, xonanda sifatida o‘zini namoyon qildi. Qiz o‘ziga Sofia Eve taxallusini tanladi.
Yuriy Nikulin va kichik Yuriy Nikulin
Yuriy Nikulinning nabirasi ham bir paytlar o‘z hayotini san’at bilan bog‘lashni rejalashtirgandi. U Moskva teatr san’ati maktab-studiyasini tugatib, bir necha bor ekranlarda epizodik rollarda ko‘ringan. Biroq ma’lum bir vaqtda kichik Yuriy Nikulinni sirk ko‘proq qiziqtira boshladi va u Rangli xiyobondagi sirkda jamoatchilik bilan aloqalar bo‘limida ishlashga kirishdi. Bugun Yuriy 34 yoshda va u bobosining ishini davom ettirmoqda.
Mixail Kozakov, Yuriy Yakovlev va Mariya Kozakova
27 yoshli aktrisa Mariya Kozakovaga genlar borasida omad kulib boqqan, zero uning bobolari mashhur Mixail Kozakov va Yuriy Yakovlev edi. 7 yil avval qiz Shukin bilim yurtini tamomlagan va Satira teatrida faoliyatini boshlagan. Shu bilan birga, Mariya kinoda ham faol ishlamoqda: bugungi kunga qadar u 24 ta loyihada qatnashishga ulgurgan. Eng yorqin rollari orasida “Karmelita” va “Orlova va Aleksandrov” seriallaridagi ijrolarini aytib o‘tish mumkin.
Edita Pyexa va Stanislav Pyexa
Edita Pyexa singari mashhur buvisi bor Stanislavning musiqachi bo‘lmasdan iloji yo‘q edi. Tomoshabinlar uni birinchi marta “Yulduzlar fabrikasi” ko‘rsatuvida ko‘rishgan va o‘shandan beri uning karyerasi faqat yuqorilab borgan. Hozirda 40 yoshli Stanislav qo‘shiq kuylaydi, she’rlar bitadi, televideniyeda boshlovchilik qiladi va hatto multfilmlarga ovoz berish bilan ham shug‘ullanadi.
Innokentiy Smoktunovskiy va Anastasiya Smoktunovskaya
Mashhur aktyorning nabirasi Anastasiya ham aktyorlik faoliyatini boshlashga qaror qilib, bobosining familiyasini qabul qildi. Nastya teatr institutini tugatgan bo‘lib, hozirda 38 yoshli aktrisa Armen Jigarxanyan rahbarligidagi Moskva drama teatrida faoliyat yuritmoqda. Bundan tashqari, uni teleekranlarda ham ko‘rish mumkin. Jumladan, u “Posyolkalar”, “Shifr” seriallarida va “Alekseyev haqida kino” filmida rol ijro etgan.
Yevgeniy Yevstigneyev va Sofya Yevstigneyeva
Sofya Yevstigneeva yoshligidanoq bal raqslari bilan shug‘ullanib, nufuzli musobaqalarda g‘oliblikni qo‘lga kiritgan, biroq keyinchalik o‘zini aktyorlik sohasida sinab ko‘rishga qaror qilgan. U bobosining familiyasini olib, Moskva teatr san’ati maktab-studiyasiga o‘qishga kirgan. Bugungi kunda 25 yoshli aktrisaning ijodiy faoliyatida bir nechta film va seriallar mavjud, uning eng yorqin roli esa “Qo‘riqxona” filmidagi Aurora obrazi bo‘ldi.
Alla Pugachyova va Nikita Presnyakov
Alla Borisovnaning nabirasi atigi 29 yoshda bo‘lsa-da, u allaqachon san’atning bir nechta yo‘nalishida o‘zini sinab ko‘rishga ulgurgan: aktyor, klip yaratuvchisi va musiqachi. Bugungi kunda uning musiqa sohasidagi faoliyati tobora rivojlanib bormoqda va 2018-yilda Nikita asos solgan “Multiverse” guruhi o‘zining ilk albomini chiqardi. Bundan tashqari, yigit vaqti-vaqti bilan kinolarda rol ijro etishni davom ettirmoqda, YouTubeda shaxsiy blogini yuritmoqda va parkur bilan shug‘ullanmoqda.
Izoh (0)