Agar moda va musiqa bir-biridan alohida mavjud deb o‘ylasangiz, adashasiz. Har ikki soha bir-biri bilan chambarchas bog‘liq bo‘lib, buni aynan kliplar, konsertlar va gastrollar tasdiqlaydi.
Keti Perrining libosi
Narxi: 20 ming dollar
Ro‘yxatni Keti Perrining 2015-yilda Super Bowl da chiqqan eng qimmat va hashamatli obrazidan boshlaymiz. O‘sha yili u eng katta sport tadbirining bosh qahramoni bo‘lganligi sababli libosi ham shunga yarasha bo‘lishi kerak edi. Bu borada qo‘shiqchi Moschino ijodiy direktori lavozimini egallagan Jeremi Skottga murojaat qiladi. Aynan u Perri uchun 20 ming dollarlik libos yaratgan.
Elton Jonning smokingi
Narxi: 100 ming dollar
Elton Jonning sahna qiroli va hayratlanarli obrazlar dahosi ekanligi bilan hech kim bahslashishga jur’at eta olmaydi. Uning barcha kiyimlari eng mayda detallarigacha o‘ylangan. Elton Jonning eng mashhur liboslaridan biri bu Motsartdan ilhomlanilgan kostyum. 1988-yilda qo‘shiqchi uni (va boshqa ko‘plab narsalarni) o‘tmish bilan ramziy xayrlashuv sifatida kimoshdi savdosida sotadi. Biroz vaqt o‘tgach, oq smokingning egasi uni 100 ming dollarga sotib yuboradi.
Taylor Sviftning ko‘ylagi
Narxi: 21 ming dollar
Teylor Svift ham sahna ko‘rinishi uchun hech qachon pulini ayamaydi. Yaqinda qo‘shiqchi katta gastrol uyushtirdi, uning liboslari alohida e’tiborga loyiqdir. Konsert mehmonlari va tomoshabinlari Oskar De La Rentaning uch ming dollarlik kostyumini va ikki ming dollarlik Roberto Kavalli kombinezonini ko‘rishdi. Lekin eng esda qolarli obraz xonanda uchun Zuhair Murod modalar uyi tomonidan yaratilgan 21 minglik pushti ko‘ylak bo‘ldi.
Maykl Jeksonning kurtkasi
Narxi: 289 ming dollar
1987-yilda Maykl Jeksonning birinchi jahon gastroli bo‘ladi. Gastrol davomida u 15 mamlakatga sayohat qilib, 123 ta konsert berishga muvaffaq bo‘ladi. Ulardan birida xonanda kumush detallari bo‘lgan qora kurtkada sahnaga chiqadi. Yillar o‘tib, ushbu konsert libosi kimoshdi savdosida aqlbovar qilmas narxga — 289 ming dollarga sotiladi.
Maykl Jeksonning olmos qo‘lqoplari
Narxi: 350 ming dollar
Keyingi qimmat lot bu — pop qirolining sevimlisi bo‘lgan brilliant qo‘lqop. Afsonaga ko‘ra, faqat bitta qo‘lqop kiyish g‘oyasi Jeksonning Robert Abel Associates ofislari bo‘ylab sayohati paytida tug‘ilgan. O‘sha yerda u o‘ng qo‘liga oq qo‘lqop kiygan holda filmni ko‘zdan kechirayotgan rejissyor Rik Rossni ko‘rib qoladi. Musiqachiga bu obraz yoqadi. Aksessuar e’tiborni jalb qilishi kerakligi sababli Jekson uni bezashni so‘raydi. Bir necha yil o‘tgach, o‘sha olmos bilan bezatilgan qo‘lqop yaratiladi. Xonandaning o‘limidan so‘ng u kimoshdi savdosida rekord darajadagi 350 ming dollarga sotiladi.
Elvis Preslining pidjagi
Narxi: 1 million dollar
Biroq eng qimmat sahna obrazi Maykl Jeksonga emas, balki Elvis Presliga tegishli. 1972-yilda rok-n-roll qiroli Nyu-Yorkdagi Madison Square Garden’da hashamatli oq kombinezon kiygan holda chiqish qiladi. Bu obrazni dizayner Bill Belyu qo‘shiqchi uchun maxsus yaratgan. Ikki yil avval kostyum kimoshdi savdosida 1 million dollarga sotilgan.
Izoh (0)