Ijro mahorati, tabiiy go‘zalligi va nazokati bilan kino sanoatida o‘z o‘rniga ega italiyalik aktrisa Monika Beluchchi 30-sentyabr kuni 60 yoshga to‘ldi. O‘ziga xos joziba, aslzodalarga xos qarash va nafislik mujassam bo‘lgan aktrisaning shaxsiy moda uslubi mavjud. AdMe nashri Monika Beluchchining bunday nafis kiyinish uslubi va go‘zallik sirlari nimada ekanini aniqlashga qaror qildi.
Leopard printli matolarni baza kiyim sifatida qo‘llash
Monikaning sevimli va tez-tez foydalanadigan matolaridan biri leopard tasvirli kiyimlardir. Aktrisa bunday yorqin tasvirli liboslarni kiyishdan uyalmaydi va o‘zining latofatli ko‘rinishi tufayli mato aktrisa egnida tabiiy va qulay ko‘rinadi.
Monika boshqa yulduzlardan farqli o‘laroq ommaga kalta yubka va liboslarda namoyon bo‘lmaydi va asosan midi hamda maksi uzunliklarga urg‘u beradi.
Odatiy kun uchun ham, oqshomga ham birdek mos keladigan libos tanlash
Beluchchi o‘zining garderobida kundalik kiyimni rasmiy kechki libosga osongina o‘zgartirish mumkin bo‘lgan obrazlar bo‘lishi kerakligini aytgan:
“Sodda ko‘rinishdagi qora ko‘ylakni turli zargarlik buyumlar va aksessuarlar bilan to‘ldirish orqali uni bayramona ko‘ylakka aylantirish mumkin”.
Klassika Monikaning jon-u dili
Kundalik hayotda aktrisa ko‘pincha oq ko'ylak va tekis bichimli qora yubka kiyadi. Bu obrazni har qanday ustki kiyim bilan moslashtirish oson bo‘lib, ortiqcha harakatlarsiz nazokatli ko‘rinish imkonini beradi.
Beluchchi moda va turli brendlar ortidan quvmaydi va “moda qurboni” emasligi bilan faxrlanadi. Aktrisa shunchaki o‘ziga nima mos kelishini biladi, shuning uchun turli do‘konlarda aylanish uchun soatlab vaqtini ketkazmaydi.
Eng ideal uzunlik — midi
Beluchchi kamdan-kam hollarda kalta ko‘ylakda namoyon bo‘ladi va ochiq yubkalarni yoqtirmaydi:
“40 yoshdan oshganingizda insonlarga yosh qizdek ko‘rinishga harakat qilishdan ma’no yo‘q. Bizning yoshimizda ayollarga xos nafis bo‘lishga e’tibor qaratganimiz ma’qul, deb o‘ylayman”, — deydi aktrisa.
Yorqin bo‘lmagan makiyaj
Har qanday obrazga tugal ko‘rinish beradigan detal bu kosmetikadir, ammo Monika hech qachon o‘ta quyuq makiyajdan foydalanmaydi. Aktrisa yuzidagi tabiiy ifoda yo‘qolishini istamaydi hamda eng yirik tadbirlarga ham neytral ko‘rinishda tashrif buyurishga harakat qiladi.
Aktrisaning eng sevimli rangi — qora
Beluchchining ko‘plab qora liboslari orasida klassik qora kostyum alohida o‘rin tutadi. Uning garderobida yorqin rangli liboslar ham bo‘lsa ham, asosiy qismini sokin va to‘q rangli liboslar tashkil qiladi. Monika aytganidek, moda qoidalari ularni buzish uchun o‘ylab topilgan.
Izoh (0)