Sobiq figurali uchuvchi va Vogue moda jurnali muharriri Vera Vong 40 yoshida o‘z biznesini boshladi. Vera to‘y liboslari industriyasini butunlay o‘zgartirib olamshumul brend yaratdi. Bugungi kunda dizaynerning nomi mashhur teleko‘rsatuvlarda tilga olinadi va uning mijozlari dong‘i ketgan taniqli shaxslar.
Vera Ellen Vong 1949-yil 27-iyunda Nyu Yorkda xitoylik muhojirlar oilasida tug‘ilgan. Uning onasi BMTda tarjimon bo‘lib ishlagan, otasi esa tibbiyot kompaniyasiga egalik qilgan. Oila shaharning yuqori Sharqiy tomonida yashardi.
Vongning so‘zlariga ko‘ra, uning modaga qiziqishi onasi tufayli paydo bo‘lgan, onasining bejirim kiyinishi qizda o‘zgacha taassurot uyg‘otardi. Kollejdagi yozgi ta’til paytida bo‘lajak model hatto Yves Saint Laurent do‘konida sotuvchi bo‘lib ham ishlagan.
8 yoshida Vera figurali uchish bilan shug‘ullana boshlaydi. 1968-yilda u AQSH chempionatida ishtirok etgan, u hatto Olimpiadaga yo‘l olishi mumkin edi, ammo saralashdan o‘ta olmagan. Garchi bu muvaffaqiyatsizlik uning sport karyerasini tugatgan bo‘lsa-da, qizni boshqa o‘zgarishlar tomon yo‘naltirdi:
“Men asabiy bo‘lib qolgandim va semestrni qolganini Parijda o‘tkazdim. Aynan shu yerda modaga qiziqishimni angladim”.
Keyinchalik Vera bir nechta figurali uchuvchilar uchun liboslar dizaynini yaratdi, ular orasida Nensi Kerrigan va Mishel Kvanlar ham bor edi. 2010-yilda Vankuver Olimpiadasida Vong yaratgan libosda qatnashgan figurali uchuvchi Evan Laysachek esa oltin medalni qo‘lga kiritadi. Ayolning o‘zi sport uni intizomga o‘rgatganini tan oladi: “Yiqilsangiz, o‘rningizdan turasiz va yana urinib ko‘rasiz.”
Bo‘lajak dizayner Fransiyadagi Sorbonna universitetida o‘qib, Sara Lourens kollejida san’atshunoslik darajasini olgan. Ammo 1971-yilda Vera Vong Vogue jurnalida assistent bo‘lib ishlay boshlaydi va tez orada jurnalning eng yosh muharririga aylanadi.
“Qattiqqo‘l xonim — bu Vogueda ishlashning yumshoq talqini”, deydi Vera. Birinchi kun u yerga ko‘ylak va platformali tuflida borganman. Muharrir meni ko‘rib:“Uyga borib, kiyimingni almashtir. Vogueda bunday kiyinishmaydi!”, deb baqirgan. Men darhol jinsi shim, krossovka va futbolka kiyib olganman”.
Vogueda 17 yil ishlagandan so‘ng, Vera Vong moda muharriri lavozimidan ketib, jurnalni dugonasi Anna Vinturga topshiradi. Keyinchalik Ralph Lauren kompaniyasida dizayner bo‘lib ishga kiradi.
Vera Vong birinchi to‘y libosini o‘zi uchun tikkan. 1989-yilda dizayner investor Artur Bekker bilan unashtiriladi. To‘yga tayyorgarlik ko‘rishar ekan, 39 yoshli kelin uning yoshidagi ayollar uchun to‘y liboslari unchalik ko‘p emasligini tushunadi. Shunda u butun sanoatni o‘zgartirishga qaror qiladi.
“Men liboslar dizayni haqida hech narsa bilmasdim. Ralph Lauren kompaniyasidan ketganimdan so‘ng avvallari men uchun ochiq bo‘lgan ko‘plab eshiklar yopildi. Bu xoh mato ishlab chiqaruvchisi bo‘lsin, xoh men bormoqchi bo‘lgan ziyofat”.
Bunday paytda Verani otasi qo‘llab-quvvatlaydi. Biznesmen sifatida u qiziga uning g‘oyasi ajoyib ekanini aytib, odamlar har doim turmush qurishadi, demak, mijozlar oqimi barqaror bo‘ladi, deydi.
1990-yilda Vera Nyu Yorkdagi Carlyle mehmonxonasida o‘z salonini ochadi. Bir necha yil o‘tgach, uning saloni tadbirlar uchun liboslar yaratishni boshlaydi. Shu bilan birga, Vera va Artur Bekker ikki nafar qizni asrab olishadi: Sesiliya va Jozefina.
Vera Vongning to‘y liboslari nafaqat oddiy qizlarning, balki mashhurlarning ham orzusiga aylanadi. Uning mijozlari orasida Viktoriya Bekhem, Gven Stefani, Merayya Keri, Ariana Grande, Kim Kardashyan, Xeyli Biber, Tina Kunaki, Jennifer Lopes va boshqa ko‘plab mashhurlar bor.
“G‘iybatchi qiz” serialidagi Bler Uoldorf Veraning to‘y libosida turmushga chiqadi. “Kelinlar jangi” filmida esa Keyt Xadson qahramoni keyinchalik mashhur bo‘lib ketgan hazil iborani aytadi: “Siz Vera Vang libosini o‘zingizga moslashtirolmaysiz, o‘zingizni libosga moslashtirasiz”.
Vera Vangning liboslari “Gremmi” va “Oskar” kabi yirik tadbirlarda ham ko‘zga tashlanadi.
“Men uchun qulaylik juda muhim. Yaratgan liboslarimni kiygan ayollarning aksariyati yonimga kelib: “Sizning ko‘ylagingizda o‘zimni juda qulay his qildim”, deyishadi”, dedi dizayner.
Veraning ijtimoiy tarmoqlarda ham sahifasi bor va u yerda qahramonimiz raqs tushayotganini, dizaynerlik ishlari va kiyim javonidagi buyumlarini namoyish etayotgan videolarni joylashtiradi. Yaqinda bergan intervyusida dizayner rejissyorlik kasbini egallamaganidan eng ko‘p afsuslanishini tan oldi.
Qizig‘i shundaki, 2009-yilda dizayner Barbie qo‘g‘irchog‘i uchun to‘y libosini yaratdi va 2021-yil may oyida brend qo‘g‘irchoqni Vera Vong qiyofasida ishlab chiqardi.
Ko‘pchilik muxlislar fikriga ko‘ra, Vera 72 yosh bo‘lishiga qaramay juda yosh ko‘rinadi. Dizaynerning aytishicha, buning siri shundaki, u ko‘p yillar davomida professional figurali uchuvchi bo‘lgan va uning tanasi “mushak xotirasi”ga ega, shuningdek, u hozirgacha sport bilan shug‘ullanadi.
Izoh (0)