An’anaviy arxitektura me’yorlariga to‘g‘ri kelmaydigan, g‘ayrioddiy shakl va tuzilmalarga ega uylarni dunyoning turli chekkasidan topish mumkin. Ularni qurishdan maqsad — dizaynerlarning ijodkorlik va tabiat bilan uyg‘unlikni ifodalashga intilishi hamda ko‘proq insonlarni jalb qilishdir. Quyida ana shunday noyob ko‘rinishga ega bir nechta uylar arxitekturasi bilan tanishamiz.
G‘udda-uy. Kaliforniya, AQSH
Daraxtda qurilgan mazkur uy qarag‘ay g‘uddasini eslatadigan noodatiy arxitekturasi bilan tanilgan. U Kaliforniyadagi o‘rmonlarda joylashgan. Arxitektor Dastin Fayder tomonidan ishlab chiqilgan mazkur uy yerdan 18 metr balandlikda joylashgan. Uning barcha tomonidan Red Vud o‘rmonining go‘zal manzarasini tomosha qilish mumkin.
Shisha pol, shift va devorlar o‘rmon o‘rtasida levitatsiya kabi sehrli muhitni yaratadi. Uyning o‘lchami kichik bo‘lishiga qaramay, ichida dam olish joyi va aqlli hammom mavjud. Uyning bir kunlik ijara puli o‘rtacha 240 AQSH dollarini tashkil etadi. G‘udda-uy tabiat qo‘ynida va tinchlikda vaqt o‘tkazishni istaganlar uchun ideal variantdir.
Kubik-rubik uylar majmui. Rotterdam, Niderlandiya
Kubik-rubik uylar Rotterdamning eng mashhur sayyohlik markazlaridan biri bo‘lib, har yili minglab xorijliklarni o‘ziga jalb qiladi. Ular 1970-yillarda mashhur golland me’mori Pit Blom tomonidan loyihalashtirilgan. Obyektlarning har biri 45 gradus burchak ostida bo‘lib, tasodifiy tarzda joylashtirilgan ulkan kubik-rubiklarni eslatadi.
Uylarning ichki qismi uch qavatdan iborat: yotoqxonalar yuqori qavatlarda, mehmonxona va oshxona quyida joylashgan. O‘zining g‘ayrioddiy tashqi ko‘rinishiga qaramay, to‘laqonlikyashash uchun mo‘ljallangan uylar hisoblanadi. Bitta kvartira narxi 275 ming dollarga baholangan.
Pufak-saroy. Lion, Fransiya
Fransiyalik moda dizayneri o‘zidan keyin noyob arxitektura namunasini qoldirdi. Futurizm va avangard namunasi bo‘lgan qabariq uy 1991-yilda modelyer Pyer Kardenning mulkiga aylandi. U vengriyalik arxitektor Antti Lovaga tomonidan ishlab chiqilgan. Turar joy Kann yaqinida, O‘rta Yer dengizi sohilidagi qoyada joylashgan.
Arxitektor g‘oyasiga ko‘ra, uy ibtidoiy odamlarning g‘orlariga o‘xshatib qurilgan. Uy qoplamasi purkaladigan betondan qilingan va pog‘onali tomlardan pastga — hovuzga tushiladi. Binoning tom qismida amfiteatr bor, uyning o‘zi esa 10 ta yotoqxonadan iborat. Bino 1200 kvadrat metr maydonni egallaydi va uning atrofidagi maydon 8500 kvadrat metrni tashkil qiladi. Uning narxi 360 million dollarga baholangan.
G‘or-uy. Mexiko, Meksika
Meksikaning Naukalpan de Xuares shahrida joylashgan noyob arxitektura inshooti 1984-yilda me’mor Xavyer Senosiayn tomonidan qurilgan. Uning ko‘rinishi quyonlar iniga o‘xshab ketadi.
174 kvadrat metr maydon barcha tomondan tuproq va yam-yashillik bilan qoplangan. Shu tufayli shamol va yomg‘irdan himoyalangan. Ulkan panorama derazalar esa quyosh nurlarining hech qanday muammosiz kirib borishiga imkon beradi.
Zamonaviy va minimalistik dizaynga ega uyning ichi keng va shinamdir. Unda yotoqxona, oshxona hamda mehmonxonasiga ega. Mazkur uy futuristik uslubni hamda yolg‘izlikda qolishni yoqtiradiganlar uchun ayni muddaodir.
Izoh (0)