AQSH prezidenti Donald Trampning rafiqasi Melaniya Tramp Oq uyda kechgan hayoti haqida hujjatli film suratga olishni rejalashtirmoqda. Bu haqda Daily Mail xabar berdi.
Nashr ma’lumotlariga ko‘ra, 54 yoshli birinchi xonim suratga olish guruhi bilan davlat rahbari qarorgohiga ko‘chib o‘tmoqda. Shu bilan birga, intervyular va umumiy kadrlarni suratga olish 2024-yil noyabr oyida saylovoldi kampaniyasining yakuniy bosqichida boshlangan.
Film Amazon Prime striming xizmatida namoyish etiladi. Ta’kidlanishicha, servis filmga bo‘lgan huquq uchun 40 million dollar to‘lagan.
Bu pulning katta qismi Melaniyaning cho‘ntagiga tushadi, chunki u prodyuser sifatida ishlaydi, deyiladi xabarda.
Melaniya Tramp turmush o‘rtog‘i Donald Trampning inauguratsiya marosimida shlyapada ko‘rinish bergani ijtimoiy tarmoqlarda keng muhokamaga sabab bo‘lgan edi. Amerikalik dizayner Erik Javits tomonidan buyurtma asosida tikilgan bosh kiyim ko‘plarning e’tiborini tortdi.
Dizaynerga ko‘ra, birinchi xonim uchun kiyinish uslubini tanlash uning kasbiy faoliyatidagi eng katta sharaflardan biri hisoblanadi. Javits bosh kiyim Melaniya Tramp shaxsiyatini qayta anglashni va konservativ qadriyatlarni aks ettirishini aytmoqda.
“Har qanday yuz turiga mos keladigan va uni yanada chiroyli ko‘rsatadigan shlyapalar yaratishga muvaffaq bo‘ldim. Bu holatda esa ishni amalga oshirish qiyin bo‘lmadi, chunki Tramp xonim juda yaxshi suyak tuzilmasiga, go‘zallikka va ajoyib uslub hissiga ega”, dedi Erik Javits.
2017-yilgi Ralph Lauren brendining moviy rangidagi kashmir ko‘ylak va qo‘lqoplaridan farqli o‘laroq, bu safar Melaniya Tramp inauguratsiyaga mustaqil amerikalik dizayner Adam Lippes tomonidan yaratilgan to‘q ko‘k ipak-jun paltoni yubka va oq ipak krep bluzkasi bilan birlashtirib kiydi.
“Prezident inauguratsiyasi an’anasi Amerika demokratiyasining go‘zalligini mujassam etadi va biz birinchi xonimimiz, Melaniya Trampga uslub tanlash sharafiga muyassar bo‘ldik. Tramp xonimning kiyimi Amerikaning eng mohir hunarmandlari tomonidan yaratildi va men bunday ishni dunyoga ko‘rsatishdan faxrlanaman”, dedi Lippes.
Melaniyaning birinchi inauguratsiya uslubi Jaklin Kennedinikiga taqqoslangandi. Kennedi 1961-yilda erining inauguratsiyasi munosabati bilan bosh kiyimda ko‘rinish bergandi. Ammo 2017-yilda birinchi xonimni kiyintirish siyosiy bahs-munozaralarga sabab bo‘ldi. Jumladan, ba’zi dizaynerlar buni rad etdi — odatda bu ular uchun orzu qilingan imkoniyatdir. O‘sha paytda ba’zi ijtimoiy tarmoq foydalanuvchilari Ralf Lorenni boykot qilishni talab qildi.
2025-yilda esa Ralf Loren birinchi xonim Jill Bayden uchun tanlov dizayneri bo‘ldi. Baydenning rafiqasi hokimiyatning o‘tishini nishonlash uchun paltosidan poyabzal va qo‘lqoplarigacha monoxromatik binafsha rangni tanladi.
Melaniya Tramp 2017-yildan 2021-yilgacha birinchi xonim sifatida faoliyat yuritgan davridan boshlab o‘zining jozibasi va uslubi bilan e’tiborni tortib kelmoqda.
Moda mutaxassislari Melaniya Trampning uslubi ko‘proq “intilish” sifatida qaralishini aytmoqda. Chunki Dior hamda Versace kabi nufuzli moda uylarining dizaynlari e’tiborini jalb qiladi.
Izoh (0)