Checheniston rahbari Ramzan Qodirovning to‘ng‘ich qizi Ayshat Qodirova o‘zining Instagram sahifasida respublika hukumati raisi o‘rinbosari lavozimini tark etganini e’lon qildi.
U “ushbu vazifa kuchli erkak kishi uchun ko‘proq mos” ekanini qayd etdi.
Uzoq mulohazalardan so‘ng Checheniston Respublikasi hukumati raisining o‘rinbosari lavozimidan ketishga qaror qildim. Bu ish men uchun muhim tajriba bo‘ldi, ijtimoiy soha yo‘nalishi respublikamiz rivojlanishida katta ahamiyatga ega, dedi Ayshat Qodirova.
Checheniston prezidentining qizi “biznes loyihalarini amalga oshirib, respublika farovonligi yo‘lida mehnat qilishni” rejalashtirayotganini qo‘shimcha qildi.
Ishonchim komilki, bu faoliyat orqali siyosat bilan shug‘ullanishga qaraganda ko‘proq foyda keltira olaman, deydi u.
Shuningdek, Ayshat moda sohasidagi ishiga qaytishini ham aytib o‘tdi.
Qodirova 2023-yil oktyabr oyida respublika bosh vaziri o‘rinbosari lavozimini egallagan, bungacha u Checheniston madaniyat vaziri bo‘lgan. Qizning iste’foga chiqish qarori haqida uning otasi Ramzan Qodirov hozircha hech qanday izoh bermadi.
2022-yil iyun oyida Ayshat Qodirova Chechenistonning birinchi prezidenti ordeni bilan, 2023-yil sentyabrida esa “Vatan madaniyati va san’atini rivojlantirish” va “ko‘p yillik samarali ijodiy faoliyati” uchun ikkinchi darajali “Vatan oldidagi xizmatlari uchun” ordeni bilan taqdirlangan.
Izoh (0)