Prezident Shavkat Mirziyoyev joriy yil 5-mart kuni Korrupsiyaga qarshi kurashish milliy kengashi yig‘ilishida ishtirok etib, mamlakatda korrupsiyaga qarshi kurashish mutlaqo yangicha yondashuvlar asosida olib borilishi bo‘yicha ko‘plab tashabbus va takliflarni ilgari surdi.
Ushbu yig‘ilishda Prezident korrupsiyaga nisbatan murosasiz bo‘lish, mazkur faoliyatga keng jamoatchilikni jalb qilish va nodavlat tashkilotlarining faolligini oshirishning ahamiyatiga alohida e’tibor qaratdi. Shuningdek, bugungi kunda jamiyatda korrupsiyaga nisbatan murosasiz bo‘lish va unga qarshi kurashishda yangi mexanizimlarni ishlab chiqish zarurligi alohida ta’kidlandi.
Ma’ruzada korrupsiyaga qarshi kurashishda nodavlat tashkilotlarning muhim roli har qachongidan ham katta ekanligi qayd etildi. Bu tashkilotlar fuqarolarning huquqlari va manfaatlarini himoya qilishda, shuningdek, korrupsiyani fosh qilishda muhim vosita bo‘lib xizmat qiladi. Davlat Rahbarining ta’kidlashicha, ushbu sohadagi ishlarni yanada kuchaytirish, ta’sirchanlik va samaradorlikni oshirish, nodavlat tashkilotlarining faolligini oshirish korrupsiyaga qarshi kurashishni yangi bosqichga olib chiqishga yordam beradi.
Bu esa, o‘z navbatida, mamlakatda so‘nggi 8 yilda korrupsiyaga qarshi kurashish tizimi yaratilib, ushbu sohada yangi bosqich boshlanganligidan dalolat beradi.
Darhaqiqat, nodavlat tashkilotlari aholi bilan to‘g‘ridan-to‘g‘ri ishlash, korrupsiyani ochiqlash, jamiyatdagi korrupsion hodisalarni fosh qilishda muhim omil bo‘lib xizmat qiladi.
Prezident ta’kidlaganidek, bu tashkilotlar korrupsiyaga qarshi kurashish jarayoniga muvaffaqiyatli ta’sir ko‘rsatishi uchun ularning faoliyatini kengaytirish bugunning dolzarb vazifalaridan biri hisoblanadi. Chunki, nodavlat tashkilotlarning faoliyati davlat va jamiyatning ishonchini qozonish va korrupsiyaga qarshi kurashishda samaradorlikka erishish uchun muhim hisoblanadi.
Bu borada korrupsiyaga qarshi kurashish bo‘yicha parlamentning nodavlat tashkilotlar bilan yaqin hamkorligini yo‘lga qo‘yishi yuqori samara beradi. Fikrimizcha, ushbu hamkorlik nodavlat tashkilotlarning imkoniyatlaridan keng foydalanishga olib keladi va korrupsiyaga qarshi kurashishni muvaffaqiyatli amalga oshirishga yordam beradi.
Shu bilan birga, parlament korrupsiyaga qarshi chora-tadbirlarni qabul qilishda nodavlat tashkilotlarning tajribasi va ko‘magiga murojaat qilish orqali bu sohada samaradorlikni oshirishga erishish mumkin bo‘ladi. Ushbu hamkorlik korrupsiyaga qarshi kurashishda to‘g‘ri yo‘nalishni belgilash va yangi loyihalarni amalga oshirish uchun keng imkoniyatlar yaratadi.
Yig‘ilishda Prezidentimiz tomonidan Korrupsiyaga qarshi kurashish bo‘yicha konvensiya talablarini monitoring qilishga nodavlat tashkilotlarni jalb qilish taklif etildi. Ushbu maqsadlar uchun har yili 10 milliard so‘mdan ajratish taklif etildi.
Bu ham, davlatning korrupsiyaga qarshi kurashishga bo‘lgan jiddiy munosabatini va ushbu faoliyatga berilgan e’tiborning kuchayganini ko‘rsatadi desak, mubolag‘a bo‘lmaydi.
Muxtasar aytganda, Prezidentimizning Korrupsiyaga qarshi kurashish milliy kengashi yig‘ilishidagi ma’ruzasi tom ma’noda milliy taraqqiyotimiz kushandasi bo‘lgan bu illatga qarshi kurashishda nodavlat tashkilotlarning rolini yanada kuchaytirishi bilan o‘ta ahamiyatlidir.
Bir so‘z bilan aytganda, bu korrupsiyaga qarshi kurashishda strategik yondashuvlarning yangi to‘lqini boshlanganini anglatadi. Bundan keyingi faoliyatda nodavlat tashkilotlar bilan samarali hamkorlikning yo‘lga qo‘yilishi mamlakatda bu illatga qarshi kurashish yanada kuchayishiga, har bir shaxsning huquqlari va manfaatlari ishonchli himoyasini ta’minlashga yordam beradi.
Sherzod Zokirov,
yuridik fanlari bo‘yicha falsafa doktori (PhD)
Izoh (0)