Islohotlar yo‘lidagi eng katta to‘siq va g‘ov bu korrupsiyadir. Bu haqda Shavkat Mirziyoyev 5-mart kuni korrupsiyaning oldini olish bo‘yicha ishlar natijadorligi va kelgusidagi ustuvor vazifalarga bag‘ishlangan kengaytirilgan yig‘ilishda aytib o‘tdi.
Davlat rahbari so‘zining avvalida islohotlar hal qiluvchi bosqichga kirayotgan hozirgi vaqtda mamlakatda korrupsiyadan xoli muhit yaratish bo‘yicha ishlarga baho berib, kelgusi vazifalarni aniq belgilab olish zarurligini ta’kidladi.
“Korrupsiya shunday yovuz illatki, u xalqning davlatga, Konstitutsiya va qonunlarga ishonchiga putur yetkazadi, barqaror rivojlanish va xavfsizlik uchun jiddiy tahdidga aylanadi”, dedi prezident.
Shavkat Mirziyoyev islohotlar yo‘lidagi eng katta to‘siq va g‘ov ham korrupsiya ekanini, buni dunyo tajribasi ham to‘liq tasdiqlashini ta’kidlab o‘tdi. Korrupsiya oqibatida jahon iqtisodiyoti yiliga 3 trillion dollar zarar ko‘rayotgani bu global xavf ekanidan dalolat ekanini qayd etdi.
Yig‘ilishda O‘zbekistonda korrupsiyaning oldini olish va unga qarshi kurashish bo‘yicha aniq tizim yaratilib, alohida qonunlar qabul qilingani, Parlament palatalarida mas’ul qo‘mitalar, Korrupsiyaga qarshi kurashish bo‘yicha milliy kengash va agentlik tashkil qilingani aytib o‘tildi.
Jamiyatda korrupsiya muammosini jamoatchilik muhokamasiga olib chiqadigan ochiq tizim, ochiq muhit yaratilgani, ayniqsa, ommaviy axborot vositalarining bu boradagi o‘rni va ta’siri ortib borayotgani qayd etildi. Ilgari bu mavzu jurnalistlar uchun mutlaqo yopiq bo‘lgani, hozirgi vaqtda mavjud holat ochiqlik va shaffoflik tomonga butunlay o‘zgargani aytildi.
Ochiqlik bo‘yicha xalqaro reytinglardagi O‘zbekistonning o‘rni 138 pog‘onaga yaxshilanib, Markaziy Osiyoda birinchi, dunyoda 30-o‘ringa ko‘tarildi.
“Takror va takror aytaman: biz ochiqlik siyosatini, so‘z erkinligi g‘oyalarini hayotga tatbiq etishda hamisha qat’iy bo‘lamiz!”, dedi davlat rahbari.
Izoh (0)