Президент Шавкат Мирзиёев жорий йил 5 март куни Коррупцияга қарши курашиш миллий кенгаши йиғилишида иштирок этиб, мамлакатда коррупцияга қарши курашиш мутлақо янгича ёндашувлар асосида олиб борилиши бўйича кўплаб ташаббус ва таклифларни илгари сурди.
Ушбу йиғилишда Президент коррупцияга нисбатан муросасиз бўлиш, мазкур фаолиятга кенг жамоатчиликни жалб қилиш ва нодавлат ташкилотларининг фаоллигини оширишнинг аҳамиятига алоҳида эътибор қаратди. Шунингдек, бугунги кунда жамиятда коррупцияга нисбатан муросасиз бўлиш ва унга қарши курашишда янги механизимларни ишлаб чиқиш зарурлиги алоҳида таъкидланди.
Маърузада коррупцияга қарши курашишда нодавлат ташкилотларнинг муҳим роли ҳар қачонгидан ҳам катта эканлиги қайд этилди. Бу ташкилотлар фуқароларнинг ҳуқуқлари ва манфаатларини ҳимоя қилишда, шунингдек, коррупцияни фош қилишда муҳим восита бўлиб хизмат қилади. Давлат Раҳбарининг таъкидлашича, ушбу соҳадаги ишларни янада кучайтириш, таъсирчанлик ва самарадорликни ошириш, нодавлат ташкилотларининг фаоллигини ошириш коррупцияга қарши курашишни янги босқичга олиб чиқишга ёрдам беради.
Бу эса, ўз навбатида, мамлакатда сўнгги 8 йилда коррупцияга қарши курашиш тизими яратилиб, ушбу соҳада янги босқич бошланганлигидан далолат беради.
Дарҳақиқат, нодавлат ташкилотлари аҳоли билан тўғридан-тўғри ишлаш, коррупцияни очиқлаш, жамиятдаги коррупцион ҳодисаларни фош қилишда муҳим омил бўлиб хизмат қилади.
Президент таъкидлаганидек, бу ташкилотлар коррупцияга қарши курашиш жараёнига муваффақиятли таъсир кўрсатиши учун уларнинг фаолиятини кенгайтириш бугуннинг долзарб вазифаларидан бири ҳисобланади. Чунки, нодавлат ташкилотларнинг фаолияти давлат ва жамиятнинг ишончини қозониш ва коррупцияга қарши курашишда самарадорликка эришиш учун муҳим ҳисобланади.
Бу борада коррупцияга қарши курашиш бўйича парламентнинг нодавлат ташкилотлар билан яқин ҳамкорлигини йўлга қўйиши юқори самара беради. Фикримизча, ушбу ҳамкорлик нодавлат ташкилотларнинг имкониятларидан кенг фойдаланишга олиб келади ва коррупцияга қарши курашишни муваффақиятли амалга оширишга ёрдам беради.
Шу билан бирга, парламент коррупцияга қарши чора-тадбирларни қабул қилишда нодавлат ташкилотларнинг тажрибаси ва кўмагига мурожаат қилиш орқали бу соҳада самарадорликни оширишга эришиш мумкин бўлади. Ушбу ҳамкорлик коррупцияга қарши курашишда тўғри йўналишни белгилаш ва янги лойиҳаларни амалга ошириш учун кенг имкониятлар яратади.
Йиғилишда Президентимиз томонидан Коррупцияга қарши курашиш бўйича конвенция талабларини мониторинг қилишга нодавлат ташкилотларни жалб қилиш таклиф этилди. Ушбу мақсадлар учун ҳар йили 10 миллиард сўмдан ажратиш таклиф этилди.
Бу ҳам, давлатнинг коррупцияга қарши курашишга бўлган жиддий муносабатини ва ушбу фаолиятга берилган эътиборнинг кучайганини кўрсатади десак, муболаға бўлмайди.
Мухтасар айтганда, Президентимизнинг Коррупцияга қарши курашиш миллий кенгаши йиғилишидаги маърузаси том маънода миллий тараққиётимиз кушандаси бўлган бу иллатга қарши курашишда нодавлат ташкилотларнинг ролини янада кучайтириши билан ўта аҳамиятлидир.
Бир сўз билан айтганда, бу коррупцияга қарши курашишда стратегик ёндашувларнинг янги тўлқини бошланганини англатади. Бундан кейинги фаолиятда нодавлат ташкилотлар билан самарали ҳамкорликнинг йўлга қўйилиши мамлакатда бу иллатга қарши курашиш янада кучайишига, ҳар бир шахснинг ҳуқуқлари ва манфаатлари ишончли ҳимоясини таъминлашга ёрдам беради.
Шерзод Зокиров,
юридик фанлари бўйича фалсафа доктори (PhD)
Изоҳ (0)