Zamonaviy texnologiyalar hayotimizning ajralmas qismiga aylangan bir paytda, noutbuk tanlashda faqat uning dizayni yoki narxiga emas, balki uzoq muddat xizmat qilishiga ham e’tibor qaratish muhim. Qaysi turdagi noutbuk yaxshiroq, sifatli kompyuterning narxi qancha, qo‘shimcha parametrlar uchun ortiqcha to‘lashga arziydigan noutbuk xarid qilishda marketing aldovlariga duch kelib qolmasmikinman, degan savollar o‘ylantirayotgan bo‘lsa, quyidagi tavsiyalar siz uchun.
- Protsessorni tekshiring
Ishning tezligi va unumdorligi aynan protsessorga bog‘liq. Uning barcha xususiyatlarini avvaldan bilib olish lozim. Shuningdek, video karta va RAM ham muhim ahamiyatga ega. Ularning xususiyatlari qanchalik baland bo‘lsa, tasvir sifati shunchalik yaxshi bo‘ladi va qotib qolish holatlari kam uchraydi.
Protsessor chastotasi — bu protsessorning bir daqiqada bajarishi mumkin bo‘lgan hisob-kitoblar soni bo‘lib, turli o‘yinlar va grafik-dizaynerlik ishlari uchun 3,5 gigagertsdan yuqori raqamni tanlash maslahat beriladi.
Yadrolar soni. Ular qanchalik ko‘p bo‘lsa, noutbuk bir vaqtning o‘zida shuncha ko‘proq va murakkabroq vazifalarni bajara oladi. Bir yoki ikkita yadro — ofis uchun, to‘rtdan oltigacha —grafik dizaynerlar va yengil o‘yinlar uchun, sakkizdan boshlab — murakkab o‘yinlar, video tahrirlash va 3D modellashtirish dasturlari uchun mo‘ljallangan.
Muhim ma’lumot: o‘ta kuchli protsessor, albatta, qimmatga baholanadi. Shu sababli eng kuchli va zamonaviy protsessorni emas, aynan sizning talablaringizga javob beradigan modellarni tanlang.
- Operativ xotiraga e’tibor bering
Qattiq disk hajmi qancha katta bo‘lsa shuncha yaxshi, ammo bu asosiy parametr emas. Zamonaviy dasturlar va o‘yinlar nafaqat doimiy xotirada saqlanishi, balki tezroq ishga tushishi va qotib qolmay ishlashi uchun sizga katta hajmdagi operativ xotira kerak bo‘ladi. Hujjatlar, oddiy o‘yinlar va Internetdan foydalanish bilan bog‘liq faoliyat uchun 8 GB operativ xotira yetarli bo‘ladi. Ammo keyingi bir-ikki yil ichida siz grafik dizayn yoki IT sohasida ishlashni istasangiz, unda 16 GB dan xotiraga ega modellarga e’tibor qaratish maqsadga muvofiqdir.
- Noutbuk korpusining mustahkamligiga ishonch hosil qiling
Agar noutbukdan kafelarda va yo‘lda foydalanishni rejalashtirmoqchi bo‘lsangiz, uning korpusi mustahkam bo‘lishi shart. Hatto sifatli plastik ham shikastlanishga bardoshli bo‘lishi mumkin. Asosiysi, ishlab chiqaruvchi qurilmani qirilish, turli zarbalarga va yerga tushib ketishga chidamliligini sinovdan o‘tkazganligiga ishonch hosil qilish lozim.
Izoh (0)