Замонавий технологиялар ҳаётимизнинг ажралмас қисмига айланган бир пайтда, ноутбук танлашда фақат унинг дизайни ёки нархига эмас, балки узоқ муддат хизмат қилишига ҳам эътибор қаратиш муҳим. Қайси турдаги ноутбук яхшироқ, сифатли компьютернинг нархи қанча, қўшимча параметрлар учун ортиқча тўлашга арзийдиган ноутбук харид қилишда маркетинг алдовларига дуч келиб қолмасмикинман, деган саволлар ўйлантираётган бўлса, қуйидаги тавсиялар сиз учун.
- Процессорни текширинг
Ишнинг тезлиги ва унумдорлиги айнан процессорга боғлиқ. Унинг барча хусусиятларини аввалдан билиб олиш лозим. Шунингдек, видео карта ва RAM ҳам муҳим аҳамиятга эга. Уларнинг хусусиятлари қанчалик баланд бўлса, тасвир сифати шунчалик яхши бўлади ва қотиб қолиш ҳолатлари кам учрайди.
Процессор частотаси — бу процессорнинг бир дақиқада бажариши мумкин бўлган ҳисоб-китоблар сони бўлиб, турли ўйинлар ва график-дизайнерлик ишлари учун 3,5 гигагерцдан юқори рақамни танлаш маслаҳат берилади.
Ядролар сони. Улар қанчалик кўп бўлса, ноутбук бир вақтнинг ўзида шунча кўпроқ ва мураккаброқ вазифаларни бажара олади. Бир ёки иккита ядро — офис учун, тўртдан олтигача —график дизайнерлар ва енгил ўйинлар учун, саккиздан бошлаб — мураккаб ўйинлар, видео таҳрирлаш ва 3D моделлаштириш дастурлари учун мўлжалланган.
Муҳим маълумот: ўта кучли процессор, албатта, қимматга баҳоланади. Шу сабабли энг кучли ва замонавий процессорни эмас, айнан сизнинг талабларингизга жавоб берадиган моделларни танланг.
- Оператив хотирага эътибор беринг
Қаттиқ диск ҳажми қанча катта бўлса шунча яхши, аммо бу асосий параметр эмас. Замонавий дастурлар ва ўйинлар нафақат доимий хотирада сақланиши, балки тезроқ ишга тушиши ва қотиб қолмай ишлаши учун сизга катта ҳажмдаги оператив хотира керак бўлади. Ҳужжатлар, оддий ўйинлар ва Интернетдан фойдаланиш билан боғлиқ фаолият учун 8 ГБ оператив хотира етарли бўлади. Аммо кейинги бир-икки йил ичида сиз график дизайн ёки IT соҳасида ишлашни истасангиз, унда 16 ГБ дан хотирага эга моделларга эътибор қаратиш мақсадга мувофиқдир.
- Ноутбук корпусининг мустаҳкамлигига ишонч ҳосил қилинг
Агар ноутбукдан кафеларда ва йўлда фойдаланишни режалаштирмоқчи бўлсангиз, унинг корпуси мустаҳкам бўлиши шарт. Ҳатто сифатли пластик ҳам шикастланишга бардошли бўлиши мумкин. Асосийси, ишлаб чиқарувчи қурилмани қирилиш, турли зарбаларга ва ерга тушиб кетишга чидамлилигини синовдан ўтказганлигига ишонч ҳосил қилиш лозим.
Изоҳ (0)