Yangi smartfon va gadjetlarning narxi tobora qimmatlashib borar ekan, ko‘plab foydalanuvchilar tejash maqsadida avval ishlatilgan devayslarni tanlaydi. Bunday mayda texnikalarni bepul reklama joylashtiriladigan turli saytlar yoki turli chakana savdo nuqtalarida sotib olish mumkin. Ammo bunday xarid har doim barakali bo‘lavermaydi. Keling, eski gadjetlarni sotib olishning barcha kamchiliklarini ko‘rib chiqamiz.
Quloqchinlar
Katta quloqchinlar yoki mini garnituralar tezda eskiradi. Doimiy yelkada osib yurish natijasida quloqchin ichidagi ba’zi detallarga shikast yetishi, bir tomoni yaxshi ishlamasligi, ovoz sifati pasayishi mumkin. Asosiy muammo shundaki, bu kamchiliklarning barchasi sotib olishdan avval tekshiruv paytida namoyon bo‘lmasligi mumkin. Qolaversa, bunday ishlatilgan gadjetni sotib olish gigiyena qoidalariga ziddir.
Elektr ustara va tish yuvish cho‘tkasi
Elektr tish cho‘tkasining yuvish qismini almashtirishingiz va elektr ustaraga yangi setka o‘rnatishingiz mumkin. Ammo uning batareyasini almashtirish unchalik oson bo‘lmaydi. Bunday gadjetlarning xizmat muddati noaniq, ularning avtonom ishlash xususiyati tezda buziladi. Shuning uchun bunday qurilmaning mutlaqo yangisini sotib olish oqilona tanlov bo‘ladi. Yoki shunchaki elektronikasiz oddiy tish cho‘tkasi va ustara xarid qiling — ular buzilmaydi, arzon turadi va doimiy almashtirib turiladi.
Power Bank (Tashqi akkumulyator)
Portativ quvvat manbalarida litiy-ion yoki litiy-polimer akkumulyatorlaridan foydalanadi, ularning zaryadlash davri cheklangan. Ishlatilgan Power Bank’lar telefon batareya quvvatini zaiflashtiradi va batareya xizmat muddati kamayadi. Power Bank xarid qilishdan avval siz buni tekshira olmaysiz. Ayniqsa, mashhur brendlarning soxta tashqi akkumulyatorlari telefonga zarar yetkazadi.
SSD qattiq disklari
Onlayn savdo platformalarida ishlatilgan kompyuter qurilmalariga to‘la. Ammo u yerdan ma’lumotni saqlash uchun foydalaniladigan qattiq disklar, SSD disklar va fleshkalarni sotib olishni tavsiya qilmaymiz. Chunki ulardagi xotira yacheykalari cheklangan miqdorda qayta yozish sikliga ega. SSD diskka ma’lumotlarni qayta yozganda uning ishlash muddati kamayadi. Albatta, maxsus dasturlardan foydalangan holda diskning qanchalik eskirganligini tekshirish mumkin, ammo ba’zi sotuvchilar bunday ma’lumotlarni soxtalashtirib olishi mumkin.
Aqlli soatlar
Smart soatlarni eski holatda xarid qilishning asosiy salbiy tomoni — uning akkumulyatori eskirishidadir. Uning batareyasini almashtirish noutbuk yoki telefondan murakkab, shu sababli yangi smart watch sotib olish yaxshiroqdir.
Izoh (0)